தமிழக சட்டப்பேரவைத் தேர்தலில் வெற்றி வாய்ப்பு யாருக்கு?- கருத்துக் கணிப்பு முடிவு வெளியீடு

தமிழகம் மற்றும் புதுச்சேரியில் ஏப்ரல் 6-ம் தேதி ஒரே கட்டமாக தேர்தல் நடைபெறவிருக்கிறது. மே 2-ம் தேதி சட்டப்பேரவைத் தேர்தல் முடிவுகள் வெளியாகின்றன.

இந்நிலையில், தமிழக சட்டப்பேரவைத் தேர்தல் குறித்து ஏபிபி நியூஸ் மற்றும் சி-வோட்டர் நிறுவனங்கள் நடத்திய கருத்துக் கணிப்பின் முடிவுகள் வெளியாகியுள்ளன.

திமுக கூட்டணிக்கு வெற்றி வாய்ப்பு:

வரும் சட்டப்பேரவைத் தேர்தலில் திமுக கூட்டணிக்கே வெற்றி வாய்ப்பு அதிகம் இருப்பதாகக் கணிக்கப்பட்டுள்ளது. மொத்தமுள்ள 234 தொகுதிகளில் 154 முதல் 162 இடங்களையும் திமுக கூட்டணி கைப்பற்றும் என்றும் கணிக்கப்பட்டுள்ளது. மேலும் திமுக கூட்டணி, தேர்தலில் 41.4% வாக்குகளைப் பெறும் என்றும் கணிக்கப்பட்டுள்ளது.

கடந்த 2016 சட்டப்பேரவைத் தேர்தலில் திமுக கூட்டணி 39.4% வாக்குகளைப் பெற்றது. இப்போதைய கருத்துக்கணிப்பின் படி 2% கூடுதல் வாக்குகளைப் பெறும் என்று கணிக்கப்பட்டுள்ளது.

அதிமுக 15.1% வாக்குகளை இழக்கலாம்:

அதேவேளையில், அதிமுக கூட்டணி இந்தத் தேர்தலில் 28.6% வாக்குகளை மட்டுமே பெறும் என கணிக்கப்பட்டுள்ளது. கடந்த 2016 தேர்தலில் அதிமுக கூட்டணி 43.7% வாக்குகளைப் பெற்றது. அத்துடன் ஒப்பிட்டால் இந்த ஆண்டு 15.1% வாக்குகளை இழக்கும் எனக் கணிக்கப்பட்டுள்ளது. சீட் எண்ணிக்கையைப் பொறுத்தவரை, அதிமுக கூட்டணி 58 முதல் 66 தொகுதிகளைக் கைப்பற்றும் என எதிர்பார்க்கப்படுகிறது.

மநீமவுக்கு 2 தொகுதிகள் கிடைக்க வாய்ப்பு:

மக்கள் நீதி மய்யத்துக்கு 2 முதல் 6 தொகுதிகள் வரை கிடைக்க வாய்ப்புள்ளது என்று கணிக்கப்பட்டுள்ளது. அமமுக 6.9% வாக்குகளையும், இதர கட்சிகள் 14.8% வாக்குகளையும் பெறும் எனவும் கணிக்கப்பட்டுள்ளது. அமமுக 1 முதல் 5 தொகுதிகளையும், இதர கட்சிகள் 5 முதல் 9 தொகுதிகளையும் கைப்பற்றும் எனவும் கருத்துக் கணிப்பு தெரிவிக்கின்றது.

புதுச்சேரியில் என்ஆர்.காங்கிரஸுக்கு வாய்ப்பு:

புதுச்சேரியில் அதிமுக, பாஜக, என்.ஆர்.காங்கிரஸ் கூட்டணிக்கு வெற்றி வாய்ப்பு அதிகமாக இருப்பதாகக் கணிக்கப்பட்டுள்ளது. என்.ஆர்.காங்கிரஸ் கூட்டணி 45.8% வாக்குகளைப் பெறும் என்றும், 17 முதல் 21 தொகுதிகளில் வெற்றி பெறும் என்றும் கணிக்கப்பட்டுள்ளது.