ஆதிச்சநல்லூர் அகழாய்வில் 2 முதுமக்கள் தாழிகள், கை மூட்டு எழும்புகள் கண்டெடுப்பு

தூத்துக்குடி மாவட்டம் ஆதிச்சநல்லூரில் மேற்கொள்ளப்பட்டு வரும் அகழாய்வில் இரண்டு முதுமக்கள் தாழிகளும், கை மூட்டு எழும்புகளும் கண்டெடுக்கப்பட்டுள்ளன.

தூத்துக்குடி மாவட்டம், ஆதிச்சநல்லூர் மற்றும் சிவகளை பகுதியில் அகழாய்வு பணிகள் கடந்த மாதம் 25-ம் தேதி தொடங்கி நடைபெற்று வருகிறது.

ஆதிச்சநல்லூர் பரம்பு பகுதியில் 4 பகுதிகளாக அளவீடு செய்யப்பட்டு குழிதோண்டும் பணிகள் நடைபெற்று வருகின்றன. தமிழக தொல்லியல் துறையின் ஆதிச்சநல்லூர் அகழாய்வு இயக்குநர் ஜே.பாஸ்கரன் மேற்பார்வையில் 30-க்கும் மேற்பட்ட தொழிலாளர்கள் இப்பணியில் ஈடுபட்டுள்ளனர்.

இதில், இன்று இரண்டு முதுமக்கள் தாழிகளும், அதன் அருகே 2 கை மூட்டு எழும்புகளும் கண்டெடுக்கப்பட்டன. அவற்றை தொல்லியல் துறையினர் ஆய்வு செய்து வருகின்றனர்.

சிவகளை மற்றும் ஆதிச்சநல்லூரில் அகழாய்வுப் பணிகள் தொடர்ந்து நடைபெற்று வருகிறது. இதேபோல் கடந்த சில தினங்களுக்கு முன்பு சிவகளையில் 2 முதுமக்கள் தாழிகள் கண்டெடுக்கப்பட்டது குறிப்பிடதக்கது.