2011-க்கு முன்பு விண்ணப்பித்தவர்களுக்கு பெண் குழந்தைகள் பாதுகாப்பு திட்ட முதிர்வு தொகை உயர்த்தப்படாது: சமூகநலத் துறை அதிகாரி தகவல்

முதலமைச்சரின் பெண் குழந்தைகள் பாதுகாப்பு திட்டத்தின் கீழ் 2011-ம் ஆண்டுக்கு முன்பு விண்ணப்பித்தவர்களுக்கு முதிர்வு தொகை உயர்த்தி வழங்கப்படாது என்று சமூகநலத் துறை அதிகாரி ஒருவர் தெரி வித்துள்ளனர்.

முதலமைச்சரின் பெண் குழந்தைகள் பாதுகாப்பு திட்டம் கடந்த 1992-ம் ஆண்டு தமிழக அரசால் அறிமுகப்படுத்தப்பட்டது. இத்திட்டத்தின் கீழ், விண்ணப்பிக்க குடும்ப ஆண்டு வருமானம் ரூ.72 ஆயிரத்துக்குள் இருக்க வேண்டும். இத்திட்டத்தில் இணைய குழந்தைக்கு 3 வயதுக்குள் இருக்க வேண்டும்.

இத்திட்டத்தில் இணைபவர்களுக்கு ஆரம்ப கால முதலீடு 5 ஆண்டுகளுக்கு ஒருமுறை புதுப்பிக்கப்பட்டு பெண் குழந்தையின் 18 வயதுக்கு பிறகு வட்டியுடன் கூடிய முதிர்வு தொகை வழங்கப்படும்.

இத்திட்டத்தின் கீழ் கடந்த 2011 ஆகஸ்ட் 1-ம் தேதிக்கு முன்பு குடும்பத்தில் ஒரு பெண் குழந்தை இருந்தால் ரூ.22,200-மும் 2 குழந்தை இருந்தால் தலா 15200-ம் செலுத்தப்பட்டது. இந்தத் தொகை கடந்த 2011 ஆகஸ்ட்டுக்கு பிறகு ஒரு பெண் குழந்தையாக இருந்தால் ரூ.50 ஆயிரமாகவும் 2 குழந்தைகள் இருந்தால் தலா 25.000-மாகவும் உயர்த்தப்பட்டு சமூகநலத்துறையின் சார்பில் தமிழ்நாடு மின்விசை நிதி மற்றும் அடிப்படை வசதி மேம்பாட்டு நிறுவனத்தில் செலுத்தப்படுகிறது.

இதனால், 2011-ம் ஆண்டுக்குப் பிறகு விண்ணப்பித்து திட்டத்தில் இணைந்தவர்களுக்கு ஒரு பெண் குழந்தை இருந்தால் சுமார் ரூ.3 லட்சத்து 34 ஆயிரமும் 2 பெண் குழந்தைகள் இருந்தால் ஒவ்வொரு குழந்தைக்கும் ரூ.1 லட்சத்து 50 ஆயிரமும் கிடைக்கிறது. ஆனால், 2011-ம் ஆண்டுக்கு முன்பாக இத்திட்டத்தில் இணைந்தவர்களுக்கு ஒரு பெண் குழந்தையாக இருந்தால் சுமார் ரூ.1 லட்சமும் 2 குழந்தையாக இருந்தால் ஒவ்வொரு குழந்தைக்கும் சுமார் ரூ.60,000-மும் கிடைக்கிறது.

இதனால், 2011-ம் ஆண்டுக்கு முன்பு விண்ணப்பித்தவர்களுக்கு முதலீடு தொகை உயர்த்தி வழங்கப்படுமா என்று பொதுமக்கள் மத்தியில் எதிர்பார்ப்பு இருந்தது. ஆனால், அவ்வாறு, உயர்த்தி வழங்கப்படாது என்று சமூகநலத்துறை அதிகாரிகள் தெரிவித்துள்ளனர்.

இது தொடர்பாக, சமூகநலத்துறை அதிகாரி ஒருவர் கூறியதாவது:

2011-ம் ஆண்டுக்கு முன்பு பிறந்த குழந்தைகளுக்காக விண்ணப்பித்தவர்களின் முதிர்வு தொகையில் கூடுதல் பணம் செலுத்தப்படாது. அவர்கள், விண்ணப்பித்த காலக்கட்டத்துக்கு ஏற்ப முதிர்வு தொகைதான் வழங்கப்படும். அதில், எந்த மாற்றமும் இல்லை. இவ்வாறு அவர் கூறினார்.