கிருஷ்ணகிரியில் ஆற்றில் மூழ்கி 3 மாணவிகள் பலி; 8 நாட்களில் 11 பேர் உயிரிழப்பு

கிருஷ்ணகிரி

கிருஷ்ணகிரியில் காலாண்டு விடுமுறையை ஒட்டி இன்று விளையாடிக் கொண்டிருந்த 3 மாணவிகள், ஆற்றில் மூழ்கியதில் பரிதாபமாக உயிரிழந்தனர்.

கிருஷ்ணகிரி மாவட்டம் வேப்பனப்பள்ளி அருகே உள்ள நாச்சிக்குப்பம் கிராமத்தில் தனியார் காப்பகம் செயல்பட்டு வருகிறது. இதன் காப்பாளராக சகுந்தலா செயல்பட்டு வந்தார்.

கங்கமடு என்ற பகுதியில் காப்பகத்துக்குச் சொந்தமான தோட்டம் உள்ளது. காலாண்டு விடுமுறையை ஒட்டி 5 மாணவிகளை சகுந்தலா அங்கே விளையாட அழைத்துச் சென்றார். அங்கிருந்த குப்தா ஆற்றில் மாணவிகள் அனைவரும் குளித்துக் கொண்டிருந்தனர்.

சிறிது நேரத்தில் 3 மாணவிகள் காணாமல் போனது தெரியவந்தது. தேடியதில் மூவரும் ஆற்றில் மூழ்கி உயிரிழந்ததை அறிந்தனர். அதில் ஆந்திர மாநிலம், குப்பம் யேசுப்பிரியா (15), தருமபுரியைச் சேர்ந்த சித்ரா (15) ஆகிய இருவரும் வேப்பனப்பள்ளி அரசு பெண்கள் மேல்நிலைப்பள்ளியில் 10-ம் வகுப்பு படித்துக் கொண்டிருந்தனர்.
கிருஷ்ணகிரி மாவட்டம், ராமன் தொட்டியைச் சேர்ந்த அனுஷ்கா (10), நாச்சிக்குப்பம் அரசு தொடக்கப் பள்ளியில் 5-ம் வகுப்பு படித்துக் கொண்டிருந்தார்.

இதைத் தொடர்ந்து சம்பவ இடத்துக்கு விரைந்து வந்த வேப்பனப்பள்ளி காவல்துறையினர், விசாரணை செய்தனர். மாணவிகளின் உடல்களை மீட்டு கிருஷ்ணகிரி தலைமை மருத்துவமனைக்கு உடற்கூறாய்வுக்காக அனுப்பி வைத்தனர்.

8 நாட்களில் 11 பேர் பலி

கடந்த 8 நாட்களில் ஆற்றில் மூழ்கி 11 மாணவ, மாணவிகள் உயிரிழந்துள்ளனர். கடந்த செவ்வாய்க்கிழமை கந்திகுப்பத்தில் 2 குழந்தைகள், புதன்கிழமையன்று அதே பகுதியில் 2 பேர், வியாழன் அன்று அட்கோவில் ஒரு சிறுமி, சனிக்கிழமை, ஊத்தங்கரை அருகே 2 சிறுவர்கள், நேற்று மகராஜகடை அருகே ஒரு சிறுவன், இன்று 3 மாணவிகள் என 8 நாட்களில் 11 சிறுவர் சிறுமிகள், நீரில் மூழ்கி உயிரிழந்துள்ளனர்.

முன்னதாக, காலாண்டு விடுமுறையைப் பாதுகாப்பாகக் கழிக்கும்படி, அரசு நிர்வாகம் தெரிவித்திருந்தது. எனினும் போதிய விழிப்புணர்வு இல்லாததால் மாணவர்கள் பலியாவது தொடர்ந்து வருகிறது.