எதிர்ப்பவர்களை பற்றி கவலையில்லை: நடிகர் சங்கத் தேர்தலில் வெற்றி எங்களுக்குத்தான் - ராதாரவி நம்பிக்கை

தென்னந்திய திரைப்பட நடிகர் சங்கத் தேர்தல் ஜுலை 15-ம் தேதி நடைபெற உள்ளது. இதையொட்டி மதுரையில் உள்ள திரைப்பட, நாடகக் கலைஞர்களை நடிகர் ராதாரவி தலைமையிலான குழுவினர் நேற்று சந்தித்து ஆதரவு திரட்டினர். அதைத் தொடர்ந்து மதுரை ஆதீனம் அருணகிரி நாதரிடம் ஆசி பெற்றனர்.

பின்னர் நடிகர் ராதாரவி செய்தியாளர்களிடம் கூறியதாவது:

நடிகர் சங்கத் தேர்தல் குறித்து நீதிமன்றம் பிறப்பிக்கும் உத்தரவை ஏற்று நடப்போம். நடிகர் சங்கத்துக்கு எப்போது தேர்தல் வந்தாலும், அதில் எங்களுக்குத்தான் வெற்றி. சங்கத்தில் 3000க்கும் மேற்பட்டவர் கள் உள்ளனர். அனைவரது ஓட்டும் எங்களுக்குத்தான்.

நூடுல்ஸ் விளம்பரங்களில் குழந்தைகள், பெரியவர்கள் எனப் பலர் நடித்துள்ளனர். அவர்கள் மீதெல்லாம் வழக்கு போடாமல் அமிதாப்பச்சன் போன்ற நடிகர்கள் மீது வழக்கு போடுகின்றனர். பெப்சி, கோக் உள்ளிட்ட குளிர்பானங்கள்கூட கெடுதல் என்று கூறுகின்றனர்.

அப்படியெனில் அவற்றின் விளம்பரங்களில் நடித்த கிரிக்கெட் வீரர்கள் மீது வழக்கு போட வேண்டியதுதானே? என்றார் ராதாரவி.

ஆதீனம் கூறும்போது, ஆன்மிகத் துக்கும், திரைத்துறைக்கும் நிறைய தொடர்பு உண்டு. நடைபெற உள்ள நடிகர் சங்கத் தேர்தலில் சரத்குமார், ராதாரவி அணியே வெற்றி பெறும். இந்த அணிதான் இறைவனின் அணி என்றார்.