புதுச்சேரிக்கு ஓய்வெடுக்க வந்துள்ளோம்; தினகரனும் வந்து தங்குவார்: தங்க தமிழ்ச்செல்வன் எம்.எல்.ஏ பேட்டி

புதுச்சேரிக்கு ஓய்வெடுக்க வந்துள்ளோம். தினகரனும் வந்து தங்குவார் என்று தங்க தமிழ்ச்செல்வன் எம்.எல்.ஏ கூறியுள்ளார்.

டிடிவி தினகரன் ஆதரவு எம்.எல்.ஏக்கள் புதுச்சேரி - கடலூர் சாலைக்கு அருகே, சின்ன வீராம்பட்டினரம் கிராமத்தில் உள்ள தனியார் சொகுசு விடுதிக்கு வருகை தந்துள்ளனர்.

இது குறித்து தங்க தமிழ்ச்செல்வன் எம்.எல்.ஏ செய்தியாளர்களிடம் கூறுகையில், ''இன்றைய தினம் ஆளுநரை சந்தித்து முதல்வரை மாற்ற வேண்டும் என மனு கொடுத்தோம். புதுச்சேரிக்கு ஓய்வு எடுப்பதற்காக வந்துள்ளோம். எங்களுடன் துணை பொதுச் செயலாளர் தினகரனும் வந்து தங்குவார். எதிரணியில் உள்ள சட்டமன்ற உறுப்பினர்களும் எங்கள் அணியில் வந்து சேருவார்கள் என்ற நம்பிக்கை உள்ளது. விரைவில் நல்ல முடிவு வரும்'' என்றார்.

எம்.எல்.ஏ பார்த்திபன் செய்தியாளர்களிடன் கூறுகையில், ''பாதுகாப்பு கருதியே புதுச்சேரிக்கு வந்திருக்கிறோம். டிடிவி தினகரனும் இங்கு வர இருக்கிறார். எம்.எல்.ஏக்களின் எண்ணிக்கை கூடும்'' என்றார்.