தூத்துக்குடியில் இன்று முதல் 144 தடை

தூத்துக்குடி மாவட்டத்தில், வியாழக்கி ழமை (ஜன.9) முதல் 3 நாள்களுக்கு 144 தடை உத்தரவு பிறப்பிக்கப்பட்டுள்ளது. ஆட்சியர் எம். ரவிக்குமார் வெளியிட்ட செய்திக் குறிப்பு:

தேவேந்திரகுல வேளாளர் கூட்டமைப்பு நிறுவனர் மற்றும் தலைவர் மறைந்த சி.பசுபதிபாண்டியனின், 2-ம் ஆண்டு நினைவு நாள் அவரது சொந்த ஊரான தூத்துக்குடி வட்டம், அலங்காரத்தட்டில், வரும் 10-ம் தேதி வெள்ளிக்கிழமை அனுசரிக்கப்படுகிறது.

கடந்தாண்டில் நினைவு நாள் நிகழ்ச்சியின் போது, நிகழ்ந்த அசம்பாவித சம்பவங்களை கருத்தில் கொண்டு, சட்டம் ஒழுங்கை பராமரிக்கவும், பொதுமக்களின் அமைதியை உறுதி செய்யவும், 9-ம் தேதி காலை 8 மணி முதல், வரும் 11-ம் தேதி காலை 8 மணி வரை 144-ன் கீழ் தடை உத்தரவு பிறப்பிக்கப்படுகிறது.

இந்நாட்களில் ஊர்வலங்கள் நடத்தவும், 5 அல்லது அதற்கு மேற்பட்ட நபர்கள் கூடவும், தூத்துக்குடி மாவட்டம் மற்றும் வெளிமாவட்டங்களில் இருந்து அனைத்து வகை வாடகை வாகனங்கள் மூலமாகவும் நினைவு தினத்துக்கு கலந்து கொள்ள அழைத்து வரவும், குற்றவியல் நடைமுறை சட்டம் பிரிவு 144-ன் கீழ் தடை உத்தரவு பிறப்பிக்கப்படுகிறது.

இந்நாள்களில் வேறு ஏதேனும் கூட்டங்கள் மற்றும் ஊர்வலங்கள் நடத்த இருந்தால், தூத்துக்குடி மாவட்ட காவல் கண்காணிப்பாளரை அணுகி அனுமதி பெற்றுக்கொள்ளலாம். இந்த தடை உத்தரவு திருமணம் மற்றும் இறுதிச் சடங்கு ஊர்வலங்களுக்கு பொருந்தாது என்றார் ஆட்சியர்.