அமெரிக்க கப்பல் ஊழியர்கள் ஜாமீனுக்குத் தடை

அமெரிக்க ஆயுதக் கப்பலில் கைது செய்யப்பட்ட 35 பேருக்கு ஜாமீன் வழங்கி, தூத்துக்குடி முதலாவது நீதித்துறை நடுவர்மன்றம் பிறப்பித்த உத்தரவுக்கு, மாவட்ட முதன்மை அமர்வு நீதிமன்றம் இடைக்கால தடை விதித்து வெள்ளிக்கிழமை உத்தரவிட்டது.



தூத்துக்குடி அருகே இந்திய கடல் எல்லைக்குள் ஆயுதங்களுடன் நுழைந்த அமெரிக்காவின் தனியார் கப்பல் பாதுகாப்பு நிறுவனத்துக்கு சொந்தமான சீமேன் கார்டு ஓகியோ என்ற கப்பலை இந்திய கடலோர காவல் படையினர் கடந்த 12-ம் தேதி சிறை பிடித்தனர். இந்த கப்பலில் இருந்த 10 மாலுமிகள், 25 பயிற்சி பெற்ற பாதுகாவலர்களை கியூ பிரிவு போலீஸார் கைது செய்தனர்.

இந்த வழக்கில் 60 நாள்களுக்குள் போலீஸார் குற்றப்பத்திரிக்கை தாக்கல் செய்யாததால், கப்பல் ஊழியர்களை ஜாமீனில் விடுவிக்க வேண்டும் என்ற மனுவை விசாரித்த தூத்துக்குடி முதலாவது நீதித்துறை நடுவர்மன்றம் 35 பேருக்கும் வியாழனன்று ஜாமீன் வழங்கி யது. இந்த உத்தரவை எதிர்த்து, கியூ பிரிவு சார்பில் மாவட்ட முதன்மை அமர்வு நீதிமன்றத்தில் வெள்ளிக்கிழமை அவசர சீராய்வு மனுத் தாக்கல் செய்யப்பட்டது.

அதில், வெளிநாட்டினர் கைது செய்யப்பட்டு இந்திய சிறையில் அடைக்கப்பட்டிருந்தால் அவர்களை ஜாமீனில் விடுவிக்க, அந்நாட்டின் தூதரகம் மூலம் தான் உத்தரவாதம் பெற வேண்டும். ரூ. 10 ஆயிரம் பிணையில் விடுதலை செய்தால், அவர்கள் தங்கள் நாடுகளுக்கு தப்பி செல்ல வாய்ப்பு உள்ளது. அதன் பிறகு அவர்களை பிடிக்க முடியாது. வெறுமனே பிடிவாரன்ட் மட்டுமே பிறப்பிக்க முடியும்.

இந்த வழக்கில் விசாரணை நீதிமன்றம் வழங்கிய ஜாமீன், உயர்நீதிமன்ற மற்றும் உச்சநீதிமன்ற தீர்ப்புகள் மற்றும் வழிகாட்டுதல்களுக்கு முரணாக உள்ளது. எனவே, அவர்களுக்கு ஜாமீன் வழங்கி பிறப்பிக்கப்பட்ட உத்தரவை ரத்து செய்ய வேண்டும் என கியூ பிரிவு சார்பில் ஆஜரான அரசு கூடுதல் வழக்குரைஞர் கே. சிவக்குமார் வாதிட்டார்.

அவரது வாதத்தை ஏற்றுக் கொண்ட மாவட்ட முதன்மை அமர்வு நீதிபதி (பொறுப்பு) கே.வெங்கடசாமி, அமெரிக்க கப்பல் ஊழியர்கள் 35 பேருக்கும் ஜாமீன் வழங்கி தூத்துக்குடி முதலாவது நீதித்துறை நடுவர்மன்றம் வியாழக்கிழமை பிறப்பித்த உத்தரவுக்கு, மறு உத்தரவு வரும் வரை இடைக்கால தடை விதித்து உத்தரவிட்டார். மேலும், சீராய்வு மனு மீதான விசாரணை வரும் ஜனவரி 3-ம் தேதிக்கு ஒத்திவைக்கப்பட்டது.