அவிநாசியில் இருசக்கர வாகனம் சாலை தடுப்பில் மோதி விபத்து: 2 இளைஞர்கள் உயிரிழந்த பரிதாபம்

திருப்பூர் மாவட்டம் அவிநாசியில் இருசக்கர வாகன விபத்தில் இளைஞர்கள் 2 பேர் உயிரிழந்தனர்.

சேலம் இருவம்பாளையம் பகுதியைச் சேர்ந்த சிவானந்தம் மகன் ஜெகதீசன் (32) மற்றும் அதே பகுதியைச் சேர்ந்த கந்தசாமி மகன் மாது (26) இருவரும் கோவையில் இருந்து அவிநாசி நோக்கி இன்று (புதன்கிழமை) இருசக்கர வாகனத்தில் வந்து கொண்டிருந்தனர்.

 அப்போது, அவிநாசி மங்கலம் சாலை பிரிவு புறவழிச்சாலை அருகே வரும்போது நிலைதடுமாறிய இருசக்கர வாகனம் சாலை தடுப்பில் மோதி விபத்துக்குள்ளானது.

இதில் பலத்த காயமடைந்த ஜெகதீசன் சம்பவ இடத்திலேயே உயிரிழந்தார். மேலும் பலத்த காயமடைந்த மாது கோவை அரசு மருத்துவமனையில் அனுமதிக்கப்பட்டு, தீவிர சிகிச்சை பெற்றுவந்த நிலையில், அவர் சிகிச்சை பலனின்றி உயிரிழந்தார்.