குஜராத் மீனவர்களுக்கு பாதுகாப்பாக இருக்கும் மத்திய அரசு, தமிழக மீனவர்களை கைவிடுவது ஏன்? - விஜய் கேள்வி

கச்சத்தீவை மீட்பதே தமிழக மீனவர்களின் பாதுகாப்புக்கான நிரந்தர தீர்வு என்றும், இடைக்கால தீர்வாக 99 ஆண்டுகள் கச்சத்தீவை குத்தகைக்கு பெறவேண்டும் எனவும் தவெக தலைவர் விஜய் வலியுறுத்தி உள்ளார்.

இதுதொடர்பாக அவர் வெளியிட்டுள்ள அறிக்கையில் கூறியிருப்பதாவது: கச்சத்தீவு மீட்கப்படுவதே மீனவர்கள் பாதுகாப்புக்கான நிரந்தர தீர்வு. ஐ.நா.வின் கடல்சார் சட்டப் பிரகடனத்தை இலங்கை அரசு எப்போதும் மதித்து கடைபிடிக்க வேண்டும். மீனவர்களின் உயிரையும் உணர்வையும் பாதுகாப்பதே மத்திய, மாநில அரசுகளின் தலையாய கடமை. மீனவர்களின் நலன் மற்றும் கச்சத்தீவு சார்ந்த தமிழக வெற்றிக் கழகப் பொதுக்குழுத் தீர்மானம் தந்த அழுத்தம், தவெகவின் நிலைப்பாடான கச்சத்தீவு மீட்பு மற்றும் மீனவர் பாதுகாப்பு நிலைப்பாடு நோக்கி தமிழக அரசை நகர வைத்துள்ளது.

1974-ல் கச்சத்தீவு கைவிட்டுப் போகக் காரணம், அன்றைய ஆளும்கட்சியான திமுகதான். 1999-ம் ஆண்டு முதல் 2014-ம் ஆண்டு வரை மத்திய அரசுகள் இயங்கியதே திமுகவின் தயவினால்தான். அத்தகைய நிலையில் அப்போதெல்லாம் கச்சத்தீவு விவகாரத்தைக் கண்டுகொள்ளாமல் விட்டுவிட்டு, இப்போது மட்டும் தனித் தீர்மானம் என்ற கண்துடைப்பு நாடகம் ஏன்? இந்தக் கேள்வியே தமிழக மக்களிடமும் எழுந்துள்ளது.

2026 சட்டப்பேரவைத் தேர்தல் நெருங்குவதால், இப்போது தனித் தீர்மானம் இயற்றும் கபட நாடகத் திமுக அரசை தவெக கடுமையாக கண்டிக்கிறது. இலங்கை கடற்படை தாக்குதலால் தமிழக மீனவர்கள் இதுவரை 800-க்கும் மேற்பட்டோர் உயிரிழந்துள்ளனர். குஜராத் போன்ற மற்ற மாநில மீனவர்களுக்கு பாதுகாப்பாக இருக்கும் மத்திய அரசு, தமிழக மீனவர்களை மட்டும் கைவிடுவது ஏன்?

99 ஆண்டு குத்தகை: கச்சத்தீவு மீண்டும் நமது நாட்டுக்குச் சொந்தமாவது மட்டுமே தமிழக மீனவர் பிரச்சினைக்கு ஒரே தீர்வு. நிரந்தரத் தீர்வை எட்டும் வரை, இடைக்காலத் தீர்வாக 99 ஆண்டு குத்தகையாக கச்சத்தீவைப் பெற வேண்டும். இதற்கான ஒப்பந்தத்தை மத்திய அரசு எவ்வித சமரசமும் இன்றி நிறைவேற்ற வேண்டும். இலங்கைத் தமிழர்களின் வாழ்வும், பாதுகாப்பும். அமைதியும். நிம்மதியும் நிரந்தரமானதாக இருக்க, பொது வாக்கெடுப்பு மட்டுமே தீர்வு.

இலங்கை செல்லும் பிரதமர் மோடி, ‘கச்சத்தீவு இந்தியாவின் உரிமை நிலம்’ என்ற பயணத் திட்டத்தை முதன்மையாக வடிவமைக்க வேண்டும். பிரதமரின் இந்த இலங்கை பயணம் தமிழக மீனவர்கள் மற்றும் இலங்கைத் தமிழர்கள் வாழ்வில் ஒளியேற்றுவதாக மட்டுமே இருக்க வேண்டும். இவ்வாறு அதில் கூறப்பட்டுள்ளது.

வக்பு திருத்த மசோதாவுக்கு எதிராக தமிழகம் முழுவதும் ஆர்ப்பாட்டம்: வக்பு சட்ட திருத்த மசோ​தாவுக்கு எதிர்ப்பு தெரி​வித்​து, தமிழகம் முழு​வதும் தவெக​வினர் நேற்று ஆர்ப்​பாட்​டத்​தில் ஈடு​பட்​டனர். மத்​திய அரசு கொண்​டு​வந்​துள்ள வக்பு சட்ட திருத்த மசோ​தாவை எதிர்த்து தமிழகம் முழு​வதும் தமிழக வெற்​றிக் கழகம் சார்​பில் ஆர்ப்​பாட்​டம் நடை​பெறும் என கட்​சி​யின் தலைமை அறி​வித்​திருந்​தது.

அதன்​படி, சென்​னை​யில் தெற்​கு, வடக்கு மாவட்​டச் செய​லா​ளர் அப்​புனு தலை​மை​யில் பாண்டி பஜாரிலும், கிழக்கு மாவட்​டச் செய​லா​ளர் பால​முரு​கன் தலை​மை​யில் அம்​பத்​தூர் எஸ்​டேட் பேருந்து நிலை​யம் அரு​கிலும், மத்​திய சென்னை மாவட்​டச் செய​லா​ளர் குமார் தலை​மை​யில் வில்​லி​வாக்​கத்​தி​லும் ஆர்ப்​பாட்​டம் நடந்​தது. சென்னை புறநகர் மாவட்​டச் செய​லா​ளர் ஈசிஆர் பி.சர​வணன் தலை​மை​யில் பனையூரில் ஆர்ப்பாட்டம் நடை​பெற்றது. இதேபோல் தமிழகம் முழுவதும் பல்வேறு இடங்களில் ஆர்ப்​பாட்​டம் நடைபெற்றது. இதில் ஏராளமானோர் பங்கேற்றனர்.