ஹோலி பண்டிகை: சென்னை - சந்த்ரகாச்சி சிறப்பு ரயில் உட்பட 3 ரயில்கள் அறிவிப்பு

சென்னை: ஹோலி பண்டிகை முன்னிட்டு சொந்த நகரங்களுக்கு சென்று திரும்பும் பயணிகள் வசதிக்காக சென்னை சென்ட்ரல் - சந்த்ரகாச்சி சிறப்பு ரயில் உள்பட 3 சிறப்பு ரயில்கள் அறிவிக்கப்பட்டுள்ளது.

அதன் விவரம்: சென்னை சென்ட்ரலில் இருந்து மார்ச் 8, 12 (சனிக்கிழமை, புதன்) ஆகிய தேதிகளில் இரவு 11.45 மணிக்கு (வாரம் இருமுறை சிறப்பு ரயில்-06077) புறப்பட்டு, 3-வது நாள் (முறையே திங்கள், வெள்ளிக்கிழமை) காலை 7.15 மணிக்கு மேற்குவங்கம் மாநிலம் சந்த்ரகாச்சிக்கு சென்றடையும்.

மறுமார்க்கமாக, சந்த்ரகாச்சியில் இருந்து மார்ச் 10, 14 ஆகிய தேதிகளில் (திங்கள், வெள்ளிக்கிழமை) காலை 9 மணிக்கு சிறப்பு ரயில் (06078) புறப்பட்டு, மறுநாள் பிற்பகல் 3.30 மணிக்கு சென்னை சென்ட்ரலை வந்தடையும்.

போத்தனூரில் இருந்து மார்ச் 8, 15 ஆகிய தேதிகளில் (சனிக்கிழமை) முற்பகல் 11.45 மணிக்கு வாராந்திர சிறப்பு ரயில் (06055) புறப்பட்டு, திங்கள்கிழமை (3-வது நாள்) பிற்பகல் 2.30 மணிக்கு பீகார் மாநிலம் பாரெளனியை அடையும்.

மறுமார்க்கமாக, பாரெளனியில் இருந்து மார்ச் 11, 18 ஆகிய தேதிகளில் (செவ்வாய்க்கிழமை) இரவு 11.45 மணிக்கு வாராந்திர சிறப்பு ரயில் (06056) புறப்பட்டு, வெள்ளிக்கிழமை (4-வது நாள்) அதிகாலை 3.45 மணிக்கு போத்தனூரை அடையும்.

இதுதவிர, திருவனந்தபுரம் வடக்கு - ஹசரத் நிஜாமுதின் சிறப்பு ரயில் இயக்கப்பட உள்ளது. இந்த ரயில்களுக்கான டிக்கெட் முன்பதிவு தொடங்கு உள்ளது. இந்தத் தகவல் தெற்கு ரயில்வே செய்திக்குறிப்பில் தெரிவிக்கப்பட்டுள்ளது.