பொங்கல் பண்டிகையை முன்னிட்டு சென்னை - பெங்களூரு உட்பட 4 சிறப்பு ரயில்கள் இயக்கம்

பொங்கல் பண்டிகையை முன்னிட்டு, சென்னையில் இருந்து சொந்த ஊர்களுக்கு செல்ல வசதியாக, சென்னை சென்ட்ரல் - கேஎஸ்ஆர் பெங்களூரு சிறப்பு ரயில் உள்பட 4 சிறப்பு ரயில்கள் அறிவிக்கப்பட்டுள்ளன.

பொங்கல் பண்டிகை வரும் 14-ம் தேதி கொண்டாடப்படுகிறது. ஜன.15-ம் தேதி மாட்டுப் பொங்கல், ஜன.16-ம் தேதி காணும் பொங்கல் ஆகிய பண்டிகைகளும் கொண்டாடப்படுகின்றன. இதை முன்னிட்டு, சொந்த ஊர்களுக்கு செல்ல வசதியாக ஏற்கெனவே 4 சிறப்பு ரயில்கள் அறிவிக்கப்பட்டன. இதன் தொடர்ச்சியாக, சென்னை சென்ட்ரல் - கேஎஸ்ஆர் பெங்களூரு சிறப்பு ரயில் உட்பட மேலும் 4 சிறப்பு ரயில்கள் அறிவிக்கப்பட்டுள்ளன. அதன் விவரம்:

கேஎஸ்ஆர் பெங்களூருவில் இருந்து ஜன. 10-ம் தேதி காலை 8.05 மணிக்கு சிறப்பு ரயில் (07319) புறப்பட்டு, அதேநாள் பிற்பகல் 2.40 மணிக்கு சென்னை சென்ட்ரலுக்கு வந்தடையும். மறுமார்க்கமாக, சென்னை சென்ட்ரலில் இருந்து ஜன. 10-ம் தேதி பிற்பகல் 3.40 மணிக்கு சிறப்பு ரயில் (07320) புறப்பட்டு, அதேநாள் இரவு 10.50 மணிக்கு கேஎஸ்ஆர் பெங்களூருவை அடையும்.

எஸ்எம்விடி பெங்களூருவில் இருந்து ஜன.10-ம் தேதி இரவு 10 மணிக்கு சிறப்பு ரயில் (06569) புறப்பட்டு, மறுநாள் காலை 11 மணிக்கு தூத்துக்குடியை சென்றடையும். மறுமார்க்கமாக, தூத்துக்குடியில் இருந்து ஜன.11-ம் தேதி மதியம் 1 மணிக்கு சிறப்பு ரயில் (06570) புறப்பட்டு, மறுநாள் காலை 6.30 மணிக்கு மைசூரை அடையும்.

திருவனந்தபுரம் - சென்னை: சபரிமலை மகரவிளக்கு பூஜை மற்றும் பொங்கல் பண்டிகையை முன்னிட்டு, பயணிகள் வசதிக்காக, இரண்டு சிறப்பு ரயில்கள் அறிவிக்கப்பட்டுள்ளன. திருவனந்தபுரம் சென்ட்ரலில் இருந்து ஜன.15-ம் தேதி அதிகாலை 4.25 மணிக்கு சிறப்பு ரயில் (06058) புறப்பட்டு, அதேநாள் இரவு 11 மணிக்கு சென்னை சென்ட்ரலை வந்தடையும்.

மறுமார்க்கமாக, சென்னை சென்ட்ரலில் இருந்து ஜன.16-ம் தேதி அதிகாலை 1 மணிக்கு சிறப்பு ரயில் (06059) புறப்பட்டு, மறுநாள் இரவு 8 மணிக்கு திருவனந்தபுரம் சென்ட்ரலை சென்றடையும்.

எர்ணாகுளம் சந்திப்பில் இருந்து ஜன.16-ம் தேதி மாலை 6.15 மணிக்கு சிறப்பு ரயில் (06046) புறப்பட்டு, மறுநாள் காலை 8.30 மணிக்கு சென்னை சென்ட்ரலை வந்தடையும். மறுமார்க்கமாக, சென்னை சென்ட்ரலில் இருந்து ஜன.17-ம் தேதி காலை 10.30 மணிக்கு சிறப்பு ரயில் (06047) புறப்பட்டு, அதேநாள் இரவு 11 மணிக்கு எர்ணாகுளம் சந்திப்பை அடையும். இந்த சிறப்பு ரயில்களுக்கான டிக்கெட் முன்பதிவு தொடங்கிவிட்டது. இந்தத் தகவல் தெற்கு ரயில்வே செய்திக்குறிப்பில் தெரிவிக்கப்பட்டுள்ளது.