இனியும் தோற்க முடியாது... ‘அம்மா’வின் ஆர்ப்பாட்ட அரசியலை கையிலெடுத்த அதிமுக!

பதினோராவது முறையாகவும் தோற்க முடியாது என்பதால் 2026 தேர்தலை மானப்பிரச்சினையாக கையில் எடுத்திருக்கிறது அதிமுக. அதற்காக மக்கள் பிரச்சினைகளை முன்னிறுத்தி போராட ஆரம்பித்திருக்கிறது அந்தக் கட்சி. டிசம்பர் 15-ம் தேதி சென்னை வானகரத்தில் நடைபெற்ற அதிமுக செயற்​குழு, பொதுக்குழு கூட்டத்தில் பேசிய கட்சியின் துணைப் பொதுச் செயலாளர் கே.பி.​முனு​சாமி, “கட்சியில் நீண்ட காலம் பதவி சுகம் அனுபவித்​தவர்கள் பணத்தை செலவழிக்க வேண்டும். ஆளுங்கட்​சிக்கு எதிராக ஒவ்வொரு மாவட்டச் செயலா​ளரும் தேர்தலுக்குள் 10 ஆர்ப்​பாட்​டங்​களை​யாவது நடத்த வேண்டும்” என்றார். இது அதிமுக தொண்டர்​களுக்கு உற்சாக டானிக்காக அமைந்தது.

அமைச்​சர்களாக இருந்து அதிகாரத்தை சுவைத்​தவர்கள் பணத்தை வெளியில் எடுத்தால் தான் என்ன... என்ற தங்களின் மைண்ட் வாய்ஸை கே.பி.​முனுசாமி சத்தமாக பேசிவிட்​ட​தாகவே தொண்டர்கள் மகிழ்ச்​சி​யடைந்​தனர். முனுசாமியின் குரலை எடப்பாடி பழனிசாமியும் முன்மொழிந்ததை அடுத்து அதற்கு பலனும் கிடைக்க ஆரம்பித்​துள்ளது.

ஃபெஞ்சல் புயலால் பாதிக்​கப்​பட்​ட​வர்​களுக்கு நிவாரணம் கோரி விழுப்பு​ரத்தில் ஆர்ப்​பாட்டம், மதுரை அரிட்​டாபட்​டியில் டங்ஸ்டன் சுரங்கம் அமைப்பதை எதிர்த்து ஆர்ப்​பாட்டம், பேராவூரணி பேரூராட்சி முறைகேடுகளை கண்டித்து ஆர்ப்​பாட்டம் - என அதிமுக-வின் போராட்ட அறிவிப்பு பட்டியல் நீள்கிறது. இதைத்தானே எதிர்​பார்த்தோம் என்பது போல் அதிமுக தொண்டர்​களும் உற்சாகத்​துடன் ஆர்ப்​பாட்​டங்​களில் பங்கேற்று வருகின்​றனர்.

இந்நிலை​யில், அண்ணா பல்கலைக்கழக மாணவி பாலியல் விவகாரம் ஆளுங்​கட்சியை பதம்பார்க்க அதிமுக-வுக்கு இன்னொரு அஸ்திரமாக கிடைத்​துள்ளது. அதிமுக ஐடி விங்க் தயாரித்​தளித்த ‘யார் அந்த சார்?’ போஸ்டர் தமிழகம் முழுவதும் பேச வைத்துள்ளது.

லண்டனில் அப்கிரேடு அரசியலை படித்துத் திரும்பி இருக்கும் அண்ணாமலை சாட்டையடி, மகளிர் நீதிப் பேரணி உள்ளிட்ட வினோத போராட்​டங்கள் மூலம் மக்களை ஈர்த்து வருகிறார். இதன் மூலம் தமிழகத்தில் பிரதான எதிர்க்​கட்சி நாங்கள் தான் என நிரூபிக்க முயல்​கிறது பாஜக. அதற்கு இடம் தராமல் தனது இடத்தை தக்க வைக்க வேண்டிய நெருக்கடி அதிமுக-வுக்கு இருக்​கிறது.

இதுகுறித்து அதிமுக முன்னாள் அமைச்சர் சி.பொன்னையனிடம் பேசினோம். “ஊடகங்​களும், சமூக ஊடகங்​களும் திமுக அரசின் கட்டுப்​பாட்டில் உள்ளன. நாங்கள் நடத்தும் மக்கள் நலன் சார்ந்த போராட்​டங்கள் மூலம், அதே ஊடகங்​களும், சமூக ஊடகங்​களும் 2026 தேர்தலின்போது எங்களை நோக்கி திரும்​பும். அதற்காக பல புதிய வியூகங்களை அமைத்து வருகிறோம்.

அதிமுக நடத்தும் ஆர்ப்​பாட்​டங்கள், 2026 தேர்தலில் நிச்சயம் தாக்கத்தை ஏற்படுத்தி, ஆட்சி​யமைக்க உதவும். அண்ணா​மலையின் அரசியலை, அதிமுக அரசியலுடன் ஒப்பிட முடியாது. அதிமுக மக்கள் பிரச்​சினை​களுக்காக போராடி வருகிறது. அண்ணாமலை, அதானிகளின் நலனுக்காக போராடக் கூடியவர். அவரது அரசியலும், போராட்​டங்​களும் விளம்​பரத்​துக்காக செய்யப்​படு​கிறது; மக்கள் நலனுக்காக இல்லை.

இதை தமிழக மக்கள் நன்கு அறிந்​திருக்​கிறார்கள்” என்று சொன்னார் அவர். தேர்தலுக்கு சில மாதங்கள் முன்னதாக ஆர்ப்​பாட்​டங்கள், பொதுக்​கூட்​டங்களை நடத்தி ஆட்சியைப் பிடிப்பது ஜெயலலிதா ஸ்டைல். அந்த வகையில் இப்போது ஆர்ப்​பாட்​டங்களை நடத்த ஆரம்பித்​திருக்​கிறார் பழனிசாமி. வரலாறு ​திரும்​பு​கிறதா என்று ​பார்​க்​கலாம்​!