மாவட்டச் செயலாளரை மாத்துங்க..! - கையெழுத்து இயக்கம் நடத்திய திருச்சி அதிமுகவினர்

டெபாசிட்டை இழக்குமளவுக்கு அதிமுக-வின் செல்வாக்கு சரிந்த போதும் யார் மீதும் கைவைக்க முடியாத இக்கட்டில் இருக்கிறார் கட்சியின் பொதுச்செயலாளர் பழனிசாமி. அதனால் ஆங்காங்கே அதிமுக-வுக்குள் அடிதடிகள் அரங்கேறுகின்றன. அதன் உச்சமாக, மாவட்டச் செயலாளரை மாற்றக் கோரி திருச்சி மாநகரின் 35 வட்டச் செயலாளர்கள் கையெழுத்திட்டு பழனிசாமியிடமே மனு கொடுத்திருக்கிறார்கள்.

​திருச்சி மாநகர் மாவட்ட அதிமுக செயலாளராக இருந்த வெல்லமண்டி நடராஜன் ஓபிஎஸ் பின்னால் சென்ற பிறகு அந்தப் பதவி அப்போதைய மாநகர் மாணவரணி செயலா​ளரும் இபிஎஸ் ஆதரவாள​ருமான ஆவின் கார்த்தி​கேயனுக்கே கைகூடும் என அவரது ஆதரவாளர்கள் எதிர்​பார்த்​தனர். ஆனால் அதற்கு மாறாக, தினகரன் பக்கம் போய்விட்டு திரும்பிய ஜெ.சீனி​வாசனை அந்தப் பதவியில் அமர்த்தினார் இபிஎஸ்.

இது திருச்சி அதிமுக​வினர் மத்தியில் திகைப்பை ஏற்படுத்திய நிலையில், அமமுக-வில் இருந்து வந்தவர்​களுக்கே பதவிகளை வாரி வழங்குவதாக சீனிவாசனுக்கு எதிராக சிலர் சிணுக்க ஆரம்பித்​தார்கள். போதாதுக்கு, திமுக-வில் இருந்து வந்த நசீமா ஃபாரிக் என்பவரை சீனிவாசன் மாநகர் மாவட்ட மகளிரணி செயலாளர் ஆக்கியதும் அதிருப்தி கோஷ்டியை ஆத்திரப்பட வைத்தது.

இதுகுறித்​தெல்லாம் கட்சித் தலைமைக்கு தொடர்ச்​சியாக புகார்களை அனுப்பிய நிலையில், முன்னாள் அமைச்சர் தங்கமணி கள ஆய்வுக் கூட்டத்​துக்கு வந்த போது அவரது எதிரிலேயே இரண்டு கோஷ்டிகளாக மோதிக் கொண்டனர். நொந்து போன தங்கமணி, “இப்படி நமக்குள்ளேயே சண்டை போட்டுக் கொண்டிருந்தால் எதிர்க்​கட்​சியாகவே இருக்க வேண்டியது தான்” என்று சொல்லி​விட்டுப் போனார்.

இதையே துருப்பாக வைத்து சீனிவாசனின் பதவிக்கு வேட்டு​வைக்க கையெழுத்து இயக்கம் தொடங்​கியது எதிர்க்​கோஷ்டி. மாநகர் மாவட்ட ஜெ பேரவை செயலாளரான ஆவின் கார்த்தி​கேயன் இதன் பின்னணியில் இருப்பதாக ஒரு பேச்சு ஓடியது. இந்த நிலையில், சீனிவாசனை நீக்க வலியுறுத்தி 35 வட்டச் செயலா​ளர்கள் பழனிசாமி​யிடம் சேலத்​துக்கே சென்று மனு கொடுத்​திருக்​கிறார்கள்.

இதுகுறித்து பேசிய அவர்களில் சிலர், “ஆவின் கார்த்தி​கேயன், கட்சிக்கும் கட்சி​யினருக்கும் நிறையச் செலவு செய்துள்ளார். சீனிவாசன் கட்சி​யினரை கண்டு கொள்வதே இல்லை. வட்டச் செயலா​ளர்கள் சிலர் மாற்று வேட்டி வாங்கக்கூட வழியில்​லாமல் உள்ளனர். அவர்களை எல்லாம் கண்டு​கொள்ள ஆளில்லை. இப்படியே போனால் திருச்​சியில் அதிமுக என்ற கட்சி இருந்த அடையாளமே இல்லாமல் போய்விடும்” என்றனர்.

மாநகர் மாவட்டச் செயலாளர் சீனிவாசனோ, “ஆவின் கார்த்தி​கேயன் சென்னை அண்ணாநகரில் வீடு வாங்கி அங்கு குடியேறி​விட்​டார். இங்கு வருவதே இல்லை. கட்சியின் திட்ட​மிட்டு சிலர் குழப்​பத்தை ஏற்படுத்து​கின்​றனர். நசீமா ஃபாரிக் வெல்லமண்டி நடராஜன் காலத்​திலிருந்தே அதிமுக-வில் பொறுப்பில் இருக்​கிறார். துணை பொறுப்​பிலிருந்த அவருக்கு செயலாளர் பொறுப்பு இயல்பாகவே வந்துள்ளது” என்றார்.

சீனிவாசனை நீக்க மெனக்​கிடு​கிறீர்களாமே என ஆவின் கார்த்தி​கேயனைக் கேட்டதற்கு, “யாரையும் காலி செய்து​விட்டு நான் பதவி வாங்க வேண்டிய​தில்லை. மாநகர் மாவட்டச் செயலாளரை மாற்றக்கோரி நான் யாரிடமும் கையெழுத்து வாங்க​வில்லை. என் மீது களங்கம் கற்பிக்க வேண்டும் என்பதற்காக இப்படியான தகவலை சிலர் திட்ட​மிட்டுப் பரப்பி வருகின்​றனர். எனக்கு அது வேலையில்லை.

அதிருப்​தியில் இருப்​பவர்கள், நேரடியாக தலைமை​யிடம் முறையிடலாம். நான் அந்த வேலையைச் செய்ய மாட்டேன்” என்றார். எப்படி இருந்த நான் இப்படி ஆகிட்டேன் என்ற சினிமா வசனம் போல ஒரு காலத்தில் எப்படி​யாகப்பட்ட ராணுவ கட்டுப்பாட்டுடன் இருந்த அதிமுக இப்போது இப்படி ஆகிவிட்டதே!