தமிழகத்தில் கொடி கம்பங்களால் எத்தனை விபத்துகள் நேரிட்டுள்ளன? - டிஜிபி அறிக்கை தாக்கல் செய்ய நீதிமன்றம் உத்தரவு

மதுரை: தமிழகத்​தில் அரசியல் கட்சிகளின் கொடிக் கம்பங்​களால் எத்தனை விபத்துகள் நேரிட்​டுள்ளன, எத்தனை வழக்​குகள் பதிவு செய்​யப்​பட்​டுள்ளன என்பது குறித்து டிஜிபி அறிக்கை தாக்கல் செய்​யு​மாறு உயர் நீதி​மன்றம் உத்தர​விட்​டுள்​ளது.

மதுரை விளாங்​குடியைச் சேர்ந்த சித்தன், உயர் நீதி​மன்ற மதுரை அமர்​வில் தாக்கல் செய்த மனுவில் கூறி​யிருப்​ப​தாவது: என் மனைவி நாகஜோதி, மதுரை மாநக​ராட்சி அதிமுக கவுன்​சிலராக உள்ளார். அதிமுக 53-வது ஆண்டு விழாவையொட்டி விளாங்​குடி பகுதி​யில் உள்ள பழைய அதிமுக கொடிக் கம்பத்தை அகற்றி​விட்டு, புதிய கொடிக் கம்பம் வைக்க அனுமதி கோரி, மாநக​ராட்சி ஆணையரிடம் மனு அளித்​தோம். ஆனால், அனுமதி வழங்​க​வில்லை.

மாநக​ராட்சி ஆணையரை நேரில் சந்தித்து அனுமதி கேட்டபோது, பட்டா இடங்​களில் மட்டுமே கொடிக் கம்பம் அமைக்க அனுமதி வழங்க முடி​யும் என்று தெரி​வித்​தார். அதிமுக கொடி கம்பம் வைக்க அனுமதி கேட்​கும் இடத்​தில் திமுக உள்ளிட்ட பல கட்சிகளின் கொடிக் கம்பங்கள் உள்ளன. இவை எந்த அனும​தி​யும் பெறாமல் வைக்​கப்​பட்​டுள்ளன.

அதிமுக கொடிக் கம்பத்​தால் மக்களுக்​கும், போக்கு​வரத்​துக்​கும் எந்த இடையூறும் ஏற்படாது. எனவே, அதிமுக கொடிக் கம்பம் அமைக்க அனுமதி வழங்​கு​மாறு உத்தரவிட வேண்​டும். இவ்வாறு மனுவில் கூறப்​பட்​டிருந்​தது.

இந்த மனு நீதிபதி இளந்​திரையன் முன்னிலை​யில் விசா​ரணைக்கு வந்தது. பின்னர் நீதிபதி, “இந்த வழக்​கில் டிஜிபி எதிர் மனுதா​ரராக சேர்க்​கப்​படு​கிறார். பொது இடங்​களில் உள்ள அனைத்​துக் கட்சிகளின் கொடிக் கம்பங்களை அகற்ற ஏன் உத்தர​விடக்​கூடாது? கொடிக் கம்பங்​களால் எத்தனை விபத்துகள் நேரிட்​டுள்ளன? இதுவரை எத்தனை வழக்​குகள் பதிவு செய்​யப்​பட்​டுள்ளன என்பது குறித்து டிஜிபி அறிக்கை ​தாக்​கல் செய்ய வேண்​டும். விசாரணை ஜன. 3-ம் தேதிக்கு தள்ளிவைக்கப்படுகிறது” என்று உத்தரவிட்டார்.