கோவையில் கொடிநாட்டப் போவது யார்? - முட்டி மோத தயாராகும் முப்பெரும் தலைகள்!

அரசியல் தலைநகரான சென்னையை விட தொழில் நகரமான கோவைதான் இப்போது அனைத்து முக்கிய கட்சிகளுக்கும் ஒரே குறியாக இருக்கிறது. காரணம், தொடர்ச்சியாக கோவை, அதிமுகவின் கோட்டையாக இருப்பது தான். கடந்த 3 சட்டப் பேரவைத் தேர்தல்​களில் கோவை மாவட்​டத்தில் உள்ள 10 சட்டமன்ற தொகுதி​களில் பெரும்​பாலான தொகுதிகளை தொடர்ச்​சியாக தக்கவைத்து வருகிறது அதிமுக. இந்த சாதனையை முறியடிக்க வேண்டும் என்பதில் திமுக இம்முறை அதிக முனைப்பு காட்டுகிறது.

அதற்காக கோவைக்கு சிறப்பு கவனமெடுத்து திட்டங்களை அறிவித்து வருகிறார் முதல்வர் ஸ்டாலின். தான் நினைத்ததை சாதிப்​ப​தற்காக கூடுதல் பலமாக அமைச்சர் செந்தில் பாலாஜி​யிடம் தேர்தல் களப் பணியை ஒப்படைத்​திருக்​கிறார் ஸ்டாலின். தேர்தல் ‘தந்திர’ வித்தைகளை திறம்படக் கற்ற செந்தில் பாலாஜியின் வியூகங்கள் இம்முறை கோவை மாவட்​டத்தில் திமுக​வுக்கு கணிசமான எம்எல்​ஏ-க்​களைப் பெற்றுக் கொடுக்கும் என்பது திமுக தலைமையின் அசைக்க முடியாத நம்பிக்கை. அதற்கேற்ப பாலாஜியும் இப்போதே மிக நுணுக்கமாக தேர்தல் வேலைகளை தொடங்கி​விட்​டார்.

கோவை மாவட்​டத்தை அதிமுக கோட்டையாக மாற்றிக் காட்டியதன் மூலம் அதிமுகவின அசைக்​க​முடியாத சக்தியாக வளர்ந்தவர் முன்னாள் அமைச்சர் எஸ்.பி.வேலுமணி. தேர்தல் ‘மாயாஜாலங்​களில்’ செந்தில் பாலாஜிக்கு கொஞ்சமும் சளைக்​காதவர். ஆனால், பாஜகவையும் ஒதுக்​கி​விட்டு வலுவான கூட்டணி அமைவதற்கான சாத்தி​யக்​கூறுகள் கண்ணுக்​கெட்டிய தூரம் வரைக்கும் தெரியாததால் இம்முறை கோவையில் அதிமுகவை சாதனை சிகரத்தில் ஏற்றுவது வேலுமணிக்கு சற்று சவாலாகவே இருக்​கும்.

போதாக்​குறைக்கு, நடிகர் விஜய் வேறு திமுகவை எதிர்க்கும் அதிமுக வாக்கு வங்கிக்கு பங்கு கேட்டு வருவதால் வேலுமணிக்கு கூடுதல் சிக்கல் தான். இதைப் புரிந்​து​கொண்​டதால் தான், பாஜக கூட்டணி இருந்​தாலாவது பரவாயில்லை என நினைக்​கிறது வேலுமணி தரப்பு.

இதுகுறித்து நம்மிடம் பேசிய அதிமுக தேர்தல் பிரிவு செயலாளரான பொள்ளாச்சி வி.ஜெய​ராமன், “2026-ல் கோவையில் மட்டுமல்ல... 2011 தேர்தலில் தமிழகம் முழுவதும் பெற்ற பிரம்​மாண்ட வெற்றியைப் பெறுவோம். அந்தளவுக்கு திமுக ஆட்சிக்கு எதிராக மக்கள் கொதிப்பில் உள்ளனர். மக்களவைத் தேர்தல் டெல்லிக்​கானது என்பதால் கோவை மக்கள் மாற்றி வாக்களித்​தார்கள். ஆனால், சட்டமன்றத் தேர்தலில் அது நடக்காது.

எடப்பாடி பழனிசாமியின் நான்கரை ஆண்டு கால நல்லாட்​சியில் தாங்கள் மகிழ்ச்​சியாக இருந்ததை மக்கள் எண்ணிப் பார்க்​கிறார்கள். அதனால் அவர்கள் நாளைக்கே தேர்தல் வந்தாலும் அதிமுகவை ஆதரிக்க தயாராய் இருக்​கிறார்கள்” என்றார். திமுக, அதிமுக​வுக்கு அடுத்​த​படியாக பாஜகவும் கோவை மாவட்​டத்தை பெரிதும் நம்பு​கிறது. இயல்பாகவே பாஜகவுக்கு வாக்களிக்கும் மக்கள் இங்கு கணிசமாக இருப்​பதால் அண்ணாமலை இந்த மாவட்​டத்தின் மீது தனிக்​கவனம் செலுத்தி வருகிறார்.

மக்களவைத் தேர்தலில் வலுவான கூட்டணி இல்லாமலேயே கோவை தொகுதியில் சட்டமன்ற தொகுதி வாரியாக பாஜக கணிசமான ஓட்டுகளை பெற்றது. இதையெல்லாம் கணக்கெடுத்து வைத்திருக்கும் அண்ணாமலை, 2026 தேர்தலில் கூட்டணி எப்படி அமைந்​தாலும் கோவையில் பாஜக எம்எல்​ஏ-க்​களின் எண்ணிக்கையை அதிகரித்துக் காட்ட அதிரடி அரசியல் வியூகங்களுடன் காத்திருப்பதாக பாஜகவினர் சஸ்பென்ஸ் வைக்கிறார்கள். முப்பெரும் தலைகளில் யார் முந்துகிறார்கள் என்று பார்க்​கலாம்!