ஏற்காட்டில் பனிப்பொழிவால் காபி செடிகளில் காய்கள் பழுப்பது பாதிப்பு: விவசாயிகள் கவலை

சேலம்: ஏற்காடு மலை அமைந்​துள்ள சேர்​வ​ராயன் மலைத் தொடரில் கடந்த ஒரு மாதமாக கடும் பனிப்​பொழிவு நிலவி வருவ​தால், காபி செடிகளில் காய்கள் பழுப்பது தடைபட்​டுள்​ளது. இதனால் அறுவடை தாமத​மாவ​தால், விவசா​யிகள் கவலை​யடைந்​துள்ளனர்.

சேர்​வ​ராயன் மலைத்​தொடரில் அமைந்​துள்ள ஏற்காடு, தமிழகத்​தின் சிறந்த சுற்றுலாத் தலங்​களில் ஒன்றாகும். இந்த மலைத் தொடர் கடல் மட்டத்​திலிருந்து 4,000 முதல் 5,000 அடி உயரம் கொண்​டது. இதனால் ஏற்காடு உள்ளிட்ட பகுதி​களில் ஆண்டு முழு​வதும் இதமான தட்பவெப்பம் நிலவும். எனவே, இப்பகு​தி​யில் காபி, மிளகு உள்ளிட்ட பணப் பயிர்​களும், கமலா ஆரஞ்சு, பலா, பேரிக்​காய் உள்ளிட்ட பழ வகைகளும் பயிரிடப்​படு​கின்றன. தற்போது சேர்​வ​ராயன் மலைத் தொடரில் நிலவும் கடும் பனிப்​பொழிவு காரணமாக காபி செடிகளில் உள்ள காய்கள் பழுக்​காமல் உள்ளன. இதனால் அறுவடை பாதிக்​கப்​பட்​டுள்ளதாக விவசா​யிகள் கவலை தெரி​வித்​துள்ளனர்.

இதுகுறித்து ஏற்காடு தோட்​டக்கலை ஆராய்ச்சி நிலைய இணைப் பேராசிரியர் மாலதி கூறிய​தாவது: சேர்​வ​ராயன் மலைத் தொடரில் ஏற்காடு, நாகலூர், பட்டிப்​பாடி வேலூர், கொளகூர், வெள்​ளக்​கடை, செம்​மநத்தம் உள்ளிட்ட கிராமங்​களில் அராபிகா, சந்திரகிரி உள்ளிட்ட வகைகளில், 7,000 ஹெக்​டேரில் காபி சாகுபடி செய்​யப்​படு​கிறது. நடப்​பாண்டு ஏப்ரல், மே மாதங்​களில் பெய்த மழையால் காபி செடிகளில் மொட்டுகள் பூத்து, காய்கள் அதிகரித்தன. வழக்​கமாக நவம்பர் மாதத்​தில் அவை பழுத்து​விடும். இதனால் நவம்​பரிலேயே செடிகளில் இருந்து காபி பழங்கள் அறுவடை செய்​யப்​பட்டு​விடும்.

ஆனால், நடப்​பாண்டு நவம்பர் மாதம் தொடங்​கிய​தில் இருந்தே ஏற்காட்​டில் மழையுடன், கடும் பனிப்​பொழிவு நிலவு​கிறது. இதனால், காபி செடிகளில் காய்கள் பழுக்​காமல் உள்ளன. எனவே, பல கிராமங்​களில் அறுவடை பாதிக்​கப்​பட்​டுள்​ளது. கொளகூர் உள்ளிட்ட சில கிராமங்​களில் மட்டும் அறுவடை தொடங்​கி​உள்​ளது.

விளைச்சல் பாதிக்காது... பெரும்​பாலான இடங்​களில் காபி அறுவடை வழக்​கத்​தைவிட ஒரு மாதம் தாமத​மாகி​யுள்​ளது. எனினும், காபி விளைச்​சலில் பாதிப்பு ஏற்படாது. இவ்வாறு அவர் கூறினார். அதேநேரத்​தில், தொடர் பனிப்​பொழி​வால் காபி பழங்கள் அறுவடை தாமத​மாவ​தால், அவற்றின் வரு​வாயை எ​திர்​பார்த்திருந்த ​விவசா​யிகள் கவலை அடைந்​துள்ளனர்.