அரசுக் கல்லூரி கவுரவ விரிவுரையாளர்களுக்கு ஊதியம் வழங்க நிதி

சென்னை: அரசு கலை மற்றும் அறிவியல் கல்லூரிகளில் பணிபுரியும் கவுரவ விரிவுரையாளர்களுக்கு ஊதியம் வழங்குவதற்காக ரூ.155 கோடி நிதி ஒதுக்கீடு செய்யப்பட்டுள்ளது.

இதுதொடர்பாக கல்லூரிக் கல்வி இயக்குநரகம் சார்பில், அரசு கலை, அறிவியல் கல்லூரிகளின் முதல்வர்களுக்கு அனுப்பப்பட்டுள்ள சுற்றறிக்கை விவரம்:

அரசு கலை, அறிவியல் கல்லூரிகளில் உதவிப் பேராசிரியர் காலி பணியிடங்களை சமாளிப்பதற்காக கவுரவ விரிவுரையாளர்கள் சுழற்சி-1 பிரிவில் 5,699 பேரும், சுழற்சி-2 பிரிவில் 1,661 பேரும் தற்காலிக அடிப்படையில் நியமனம் செய்யப்பட்டனர். இவர்களுக்கு மாதந்தோறும் தொகுப்பூதியமாக ரூ.20 ஆயிரம் வழங்கப்படுகிறது.

நடப்பு கல்வியாண்டில் (2023-24) தற்காலிக விரிவுரையாளர்களுக்கு 11 மாதங்கள் தொகுப்பூதியம் வழங்க ஏதுவாக சுமார் ரூ.155 கோடி நிதி ஒதுக்கப்பட்டுள்ளது. உதவிப் பேராசிரியர் காலி பணியிடங்கள் நிரப்பப்படும்வரை அல்லது கல்வியாண்டின் இறுதிநாள் வரை தற்காலிகப் பணியாளர்கள் பணியில் தொடரலாம்.

இவ்வாறு அதில் கூறப்பட்டுள்ளது.