சேதி தெரியுமா?

ஜூலை 1: மகாராஷ்டிர முதல்வர் பதவியை உத்தவ் தாக்கரே ராஜினாமா செய்த நிலையில், புதிய முதல்வராக ஏக்நாத் ஷிண்டேவுக்கு ஆளுநர் பகத்சிங் கோஷ்யாரி பதவிப் பிரமாணம் செய்து வைத்தார்.

ஜூலை 2: 2035 ஆம் ஆண்டில் இந்தியாவில் நகர்ப்புற மக்கள்தொகை 67.5 கோடியை எட்டும் என்று ஐக்கிய நாடுகள் சபை ஆய்வறிக்கை தெரிவிக்கிறது.

ஜூலை 4: டெஸ்ட் போட்டியில் ஒரே ஓவரில் அதிகபட்சமாக 28 ரன்கள் எடுத்திருந்த வெஸ்ட் இண்டீஸின் பிரையன் லாராவின் சாதனையை இந்தியாவின் ஜஸ்பிரித் பும்ரா இங்கிலாந்துக்கு எதிரான டெஸ்ட் போட்டியில் முறியடித்தார்.

ஜூலை 4: தமிழகத்தில் 75 ஆயிரம் பேருக்கு வேலைவாய்ப்பை உருவாக்கும் வகையில் முதல்வர் மு.க. ஸ்டாலின் முன்னிலையில் 60 திட்டங்களுக்கான புரிந்துணர்வு ஒப்பந்தங்கள் சென்னையில் கையெழுத்தாகின.

ஜூலை 6: மாநிலங்களவை நியமன எம்.பி.களாக இசையமைப்பாளர் இளையராஜா (தமிழகம்), தடகள வீராங்கனை பி.டி.உஷா (கேரளம்), சமூக சேவகர் வீரேந்திர ஹெக்டே (கர்நாடகம்), திரைக்கதையாசிரியர் விஜயேந்திர பிரசாத் (ஆந்திரம்) ஆகியோரை நியமித்துக் குடியரசுத் தலைவர் உத்தரவிட்டுள்ளார்.

ஜூலை 7: கிரிக்கெட் வரலாற்றில் முதன்முறையாக வீரர்களுக்கு இணையாக வீராங்கனைகளுக்கு ஊதியத்தை வழங்கும் நடைமுறையை நியூசிலாந்து கிரிக்கெட் வாரியம் அமல்படுத்தியிருக்கிறது.

ஜூலை 8: கரோனா வைரஸின் ஒமைக்ரான் பிஏ.2.75 வகை வேற்றுருவாக மாறியது, இந்தியாஉள்ளிட்ட நாடுகளில் கண்டறியப் பட்டுள்ளதாக உலக சுகாதார நிறுவனம் தெரிவித்துள்ளது.

ஜூலை 8: ஜப்பான் நாட்டின் முன்னாள் பிரதமர் ஷின்ஷோ அபே (67) நாரா நகரில் தேர்தல் பிரசாரத்தில் ஈடுபட்டிருந்தபோது சுட்டுக் கொல்லப்பட்டார். ஜப்பான் வரலாற்றில் நீண்ட காலம் பிரதமராக இருந்தவர் இவர்.