இன்றைய காலக் கட்டத்தில் பருவ மெய்திய பெண்கள் முதல் மாதவிடாய்ச் சுழற்சி முடிவை நெருங்கும் பெண்கள் வரை அனைவரையும் பாடாய்ப் படுத்தும் பிரச்சினை மாதவிடாய்க் கோளாறு. மாதவிடாய் என்பது அசுத்தம் என்று கூறப்பட்ட பழைய கருத்துகளை ஒதுக்கி அது ஓர் உடல்நிலை மாற்றம் என்பதை அனைவரும் உணரத் தொடங்கியிருக்கிறார்கள்.

நம் முன்னோர்கள் காலத்தில் மாதவிடாய்க் காலத்துக்கென்று உணவு, வாழ்க்கை முறை மாற்றங்கள் வாயிலாகத் தங்களைத் தயார்செய்துகொள்ளும் பழக்கம் இருந்தது. ஆனால், தற்போதைய பரபரப்பான காலக்கட்டத்தில் மாறிவிட்ட வாழ்க்கை முறை, உணவு முறை மாற்றத்தால் பெரும்பாலான பெண்கள் மாதவிடாய் சம்பந்தமான பிரச்சினையைச் சந்திக்கின்றனர். இதைச் சித்த மருத்துவத்தின் கோட்பாடான ‘உணவே மருந்து; மருந்தே உணவு’ என்பதற்கிணங்க வரும்முன் காப்பது குறித்தும் பிரச்சினைக்கான தீர்வு குறித்தும் அறிந்துகொள்வோம்.