உயிரினங்கள்: அசைபோடும் கங்காரு

வயிற்றில் பையுடைய இந்தப் பாலூட்டிகள், ஆஸ்திரேலியா கண்டத்திலும் நியூ கினியா பிரதேசத்திலும் அதிகம் காணப்படுகின்றன.

 கங்காருவில் நான்கு வகைகள் உண்டு. ரெட் கங்காரு, ஈஸ்டர் க்ரே கங்காரு, வெஸ்டர்ன் க்ரே கங்காரு மற்றும் ஆண்டிலோப் கங்காரு.

 கங்காரு இரண்டு கால்களை காற்றில் உயர்த்திக் குதிக்கும்போது வேகமாக ஓடும். நான்கு கால்களையும் தரையில் வைத்து நடக்கும்போது மெதுவாகவே நடக்கும்.

 கங்காருவின் கால்கள் மிக சக்தி வாய்ந்தவை. அந்த கால்களால் தாக்கவும் முடியும்.

 கங்காரு தனது உயரத்தை விட மூன்று மடங்கு உயரம் தாவிக் குதிக்கும் வல்லமை படைத்தது. கங்காருவுக்கு நீந்தும் திறன் உண்டு.

 கங்காரு புல்லை விரும்பி உண்ணும்.

 குட்டிக் கங்காருகள் ‘ஜோய்ஸ்' என்று அழைக்கப்படுகின்றன.

 ரெட் கங்காரு வகைதான் வயிற்றில் பையுடைய உயிரினங்களில் பெரியது.

 காட்டில் வாழக்கூடிய கங்காரு அதிகபட்சம் ஆறு ஆண்டுகள் வாழும்.

 ஆஸ்திரேலியாவின் தேசிய விமான சேவையான கன்டாஸ், கங்காருவை தன் சின்னமாக வைத்துள்ளது.

 கங்காரு, தாவரங்களில் ஈரத்தன்மை அதிகம் உள்ள தாவரங்களைச் சாப்பிடும். அப்போதுதான் நீண்டநேரம் அதனால் நீர் இல்லாமல் இருக்க முடியும்.

 ஆடு, மாடுகளைப் போல கங்காருவும் உணவை அசைபோடும் பண்பு கொண்டது. முதலில் வேகவேகமாக உணவை விழுங்கிவிடும். பின்னர் மீண்டும் அந்த உணவை ஆசுவாசமாக வயிற்றிலிருந்து வரவழைத்து மெதுவாக மென்று விழுங்கும்.

 கங்காருவின் பற்கள் விசேஷமானவை. பழுதுபட்ட கடைவாய்ப் பற்கள் முழுமையாக உதிர்ந்து, மீண்டும் மீண்டும் வளரும் தகவமைப்பை பெற்றுள்ளன.

 கங்காருவின் வால் தசை வலு கொண்டது, நீளமானது. கங்காரு வேகமாக ஓடிக்கொண்டே திரும்பும்போது விழாமல் சமன்படுத்தும் வேலையை இந்த வால்தான் செய்கிறது.

 கங்காருகள் கூட்டமாக வாழக்கூடியவை. ஒரு கூட்டத்தில் 10 முதல் 100 கங்காருகள் வரை இருக்கும். ஆண் விலங்குகளுக்குள் ஆதிக்கத்தை நிலைநாட்ட சண்டையும் நடக்கும்.

 ஏதாவது அபாயச் சூழலை உணர்ந்தால், ஒரு கங்காரு தனது கால்களை பூமியில் வேகமாக அறைந்து மற்ற விலங்குகளை எச்சரிக்கும்.