பொம்மைகளின் கதை: கண்களை உருட்டும் ஷோன்ஹட்!

ன்ஹட் பொம்மையின் தலையைத் திருப்பலாம். காலை மடக்கி உட்கார வைக்கலாம். நம் விருப்பம்போல் கையாளும் இந்தப் பொம்மைகள் மரத்தால் செய்யப்பட்டவை.

ஷோன்ஹட் பொம்மைகளை உருவாக்கிய ஆல்பர்ட் ஷோன்ஹட்டின் சொந்த நாடு ஜெர்மனி. 1911-ல் அமெரிக்காவின் பிலடெல்பியா நகரத்தில் குடியேறினார். மரத்தில் பியானோ பொம்மைகளைச் செய்துவந்த குடும்பத்தின் மூன்றாவது தலைமுறைக் கை வினைஞர் ஆல்பர்ட். ஹம்டி டம்டி சர்க்கஸ், ரிங்மாஸ்டர், லேடி சர்க்கஸ் ரைடர் ஆகிய பொம்மைகள் இவர் உருவாக்கியவையே. இவற்றை வாங்கிய குழந்தைகள் வழியாகவே புகழ்பெற்றன.

அமெரிக்காவைச் சேர்ந்த பாஸ்வுட் மரத்திலிருந்து பொம்மையின் முகத்தை நேர்த்தியாகச் செதுக்கி எடுப்பார். அதிகபட்ச வெப்பமும் அழுத்தமும் கொடுத்து பொம்மையின் முகத்தை வழுவழுப்பாக மாற்றுவார்.

கண்களும் செதுக்கி உருவாக்கப்பட்டவைதான். ஆனால் கண்ணாடிக் கண்களைப்போல பளபளக்கும். பொம்மையின் முடியும் மரத்தில் செதுக்கப்பட்டு வண்ணம் கொடுக்கப்படும்.

கை, கால்களைத் தனியாகச் செய்து மடக்கி அசைக்கும்படி ரப்பரால் இணைக்கப்படும். காலப்போக்கில் பொம்மைகளின் வலுவுக்காகவும் வெகுதூரம் பயணிப்பதற்காகவும் எஃகு ஸ்பிரிங்குகளும் வைக்கப்பட்டன.

ஷோன்ஹட் நிறுவனம் செய்த பொம்மைகள் முதலில் 16 அங்குலம் நீளம் இருந்தன. அதன் தலையை வடிவமைத்தவர் இத்தாலிய சிற்பி கிராஜியானோ.

1915-ம் ஆண்டு தம்பியுடன் சேர்ந்து ஷோன்ஹட் அறிமுகப்படுத்திய இரண்டு குழந்தை பொம்மைகள் புகழ்பெற்றன. குறும்பு முகம் கொண்ட ஸ்கிக்கல்-பிரிட்ஸ், அழுமூஞ்சி டூட்சி வூட்சி பொம்மைகள்தான் அவை. 15 அங்குலம் உயரத்தில் இருந்தன. வெள்ளை லினன் சூட், தொப்பி அணிந்த ‘பஸ்டர் ப்ரவுன்’ பொம்மையும் புகழ்பெற்றது. இதன் உயரம் 21 அங்குலம்.

28chsuj_dolls1.jpgrightகண்களை அசைத்த பொம்மைகள்!

1919-ல் ஷோன்ஹட் சகோதரர்கள் செய்த பொம்மைகளின் மரக்கண்கள் அசையத் தொடங்கின. ஆனால் முதல் உலகப் போர் முடிந்து அமெரிக்கா மிகுந்த பொருளாதார நெருக்கடியில் இருந்தது. அதனால் கடைகளில் ஷோன்ஹட் பொம்மைகள் வாங்கப்படாமல் அலமாரிகளிலேயே காத்திருந்தன.

ஜெர்மனியிலிருந்து விலை மலிவான பொம்மைகள் அமெரிக்காவுக்கு வந்தன. அதனாலும் ஷோன்ஹட் பொம்மைகளை வாங்க ஆள் இல்லாமல் போனது. செலுலாய்ட் போன்ற எடை குறைவான பொருட்களில் செய்யப்பட்ட மென்மையான பொம்மைகள் ஏராளமாக வந்தன. அதிக எடைகொண்ட ஷோன்ஹட் பொம்மைகளுக்கு மதிப்பும் குறைந்தது.

1924-ம் ஆண்டுக்குப் பிறகு ஒரு ஷோன்ஹட் பொம்மைகூட செய்யப்படவேயில்லை.

தொடர்புக்கு: sankararamasubramanian.p @thehindutamil.co.in