அன்றாட வாழ்வில் வேதியியல் 15: விளக்குக்கு ஒளி தரும் வாயு

பிப்பெட்: என்ன பியூ. இன்னைக்கு இவ்வளவு லேட்?

பியூரெட்: புத்தாண்டுக்கு ராத்திரி முழிச்சு கேக் வெட்டினேன் இல்லையா, அதனால தூங்கல.

பிப்.: அது முந்தின நாள்தானே?

பியூ.: ஆமா, அன்னைக்குத் தூங்காததுனால இன்னைக்குத்தான் நல்லா தூங்கினேன், அதான் லேட்.

பிப்.: ஓ! 2019-க்கு ஏதாவது புதுசா தீர்மானம் எடுத்திருக்கியா?

பியூ.: ம்... எடுத்திருக்கேன்! முதல் நாள் மட்டும் கொண்டாட்டத்துக்காக ராத்திரி முழிச்சேன், அடுத்து வர்ற 364 நாளும் ராத்திரில ஒழுங்கா தூங்கணுங்கிறதுதான் என்னோட தீர்மானம். அதை இரண்டாவது நாளே ஒழுங்கா கடைப்பிடிச்சிட்டேன்.

பிப்.: உடம்புக்கு நல்ல தூக்கம் ராத்திரில ரொம்ப அவசியம். சரி, இந்த வாரம் எந்தத் தனிமத்தைக் கூட்டிட்டு வரப் போற?

பியூ.: புத்தாண்டுக் கொண்டாட்டத்துக்குப் போயிருந்தேன் இல்லையா, அங்கே சிவப்பு நிறமா ஒளிர்ற எழுத்துகளைப் பார்த்தேன். அதைப் பத்திதான் சொல்லப் போறேன்.

பிப்.: அதுல என்ன விசேஷம்?

பியூ.: சிவப்பு நிறத்தில் எழுத்துகளை ஒளிரச் செய்கிற அல்லது அணைந்து அணைந்து எரிகிற விளக்குகளை நீ பார்த்திருப்பே.

பிப்.: ஆமா, பார்த்திருக்கேன்.

பியூ.: நிறுவனப் பெயர்ப் பலகைகள், விளம்பரப் பலகைகளில் எழுத்துகள் இரவில் சிவப்பு-ஆரஞ்சு நிறத்தில் மின்னி மின்னி மறையுமே.

பிப்.: ஆமா, அதுக்கு என்ன காரணம்னு சொல்லு?

பியூ.: இந்தச் சிவப்பு-ஆரஞ்சு நிறத்துக்குக் காரணம் நியான் வாயு.

பிப்.: வாயுவா? கண்ணாடிக்கு கலர் அடிச்சிருப்பாங்கன்னுல்ல நான் நினைச்சேன்.

பியூ.: இல்ல, சிவப்பு-ஆரஞ்சு நிறத்தில் அது ஒளிர்வதற்குக் காரணம், விளக்குக்குள் இருக்கும் வாயுவுக்குள் மின்சாரம் பாய்ந்து வெளியேறுறதாலதான்.

பிப்.: இதுதான் விஷயமா? ஆச்சரியமா இருக்கே.

பியூ.: அலங்கார விளக்குகள்ல அதிகம் பயன்படுத்தப்படுறது நியான் விளக்குதான். அதேபோல, இப்போ சாலைகள்ல எல்.இ.டி. விளக்குகள் பொருத்தப்படுறதுக்கு முன்னாடி, தெருவிளக்குகளும் நியான் விளக்குகளாகவே இருந்தன.

பிப்.: ஆமால்ல, நான்கூடப் பார்த்திருக்கேனே.

பியூ.: அதேநேரம் நியான் வாயு பயன்படுத்தப்படாத மற்ற நிறங்களைத் தரும் விளக்குகளையும் நியான் விளக்குன்னே பொதுவாக அழைச்சாங்க.

பிப்.: அப்படி அழைச்சதுக்கு என்ன காரணம்?

பியூ.: அந்த விளக்குகள் எல்லாமே நோபல் வாயுக்களைப் பயன்படுத்தியவை.

பிப்.: நோபல் வாயுக்களா, ஹீலியமும் அதில்தானே வரும்?

பியூ.: ஆமா, நல்லா ஞாபகம் வெச்சிருக்கியே. இந்த வாயுக்கள் மணமற்றவை, நிறமற்றவை, அதிகம் வினைபுரியாதவை. இப்படித் தனித்தன்மை கொண்டிருப்பதால, நோபல் வாயுக்கள்னு அழைச்சாங்க.

பிப்.: ஹீலியம் மஞ்சள் நிற ஒளியை வெளியிட்டது பத்தியும் பேசினோமே.

பியூ.: நிறமாலைமானியில் பிரகாசமான சிவப்பு நிற ஒளி மூலமாகவே நியானையும் கண்டறிஞ்சாங்க.

பிப்.: சிவப்புதான் நியானோட அடையாளம்.

பியூ.: ஸ்காட்டிய வேதியியலாளர் வில்லியம் ராம்சே, பிரிட்டன் வேதியியலாளர் மோரிஸ் டிராவர்ஸ் ரெண்டு பேரும் சேர்ந்து 1898-ல நியானை அடையாளம் கண்டாங்க.

பிப்.: அப்ப இந்த நியான் விளக்கெல்லாம் எப்ப வந்துச்சு?

பியூ.: ராம்சேயும் டிராவர்ஸும் கண்டறிஞ்சு நாலே வருஷத்துல வணிகப் பயன்பாட்டுக்கு நியான் வந்திடுச்சு. அதுக்குக் காரணம் பிரெஞ்சுப் பொறியாளர் ஜார்ஜஸ் கிளாடு.

பிப்.: இவ்வளவு சீக்கிரமாவா?

பியூ.: அதுக்கு ரெண்டு வருஷம் கழிச்சு ராம்சேவுக்கு நோபல் பரிசும் கிடைச்சது.

பிப்.: பல ஆச்சரியங்களை நிகழ்த்திய வாயுவா இருக்கே!

பியூ.: நோபல் பரிசு வாங்குனது நியானுக்காக மட்டுமில்ல. முன்னாடி அவர் கண்டறிஞ்ச ஆர்கான், நியானோடு சேர்த்துக் கண்டறிஞ்ச ஸெனான், கிரிப்டான் எல்லாத்துக்கும் சேர்த்துத்தான்.

பிப்.: இந்த வாயுவெல்லாம் என்ன பண்ணுது?

பியூ.: கிரிப்டான் வாயு விளக்குகளோட ஆயுளை அதிகரிக்கப் பயன்படுது. அதாவது மின்விளக்கு இழையைப் பாதுகாக்குது. ஸெனான் பத்தி பின்னாடி சொல்றேன்.

பிப்.: சரி, அடுத்த வாரம் பார்ப்போம், பை பை பியூ.

பியூ.: பை பை பிப்.

தொடர்புக்கு: valliappan@thehindutamil.co.in