அன்றாட வாழ்வில் வேதியியல் 05: இது 5000 வருட நீலம்

பிப்பெட்: வணக்கம் பியூ. பொம்மைக் கொலுவுக்கு எல்லாம் போய்ட்டு வந்தியா?

பியூரெட்: எனக்குப் பிடித்த விதம்விதமான பொம்மைகளை எங்கே கொலு வைத்தாலும் நான் எப்படிப் போகாமல் இருப்பேன்? நானே ஒரு அறிவியல் கொலு வைச்சிருக்கேன், நீ ஏன் அதைப் பார்க்க வரல?

பிப்.: ஓ அப்படியா, வந்துட்டா போச்சு. சரி, இந்த வாரம் எந்த வேதிப்பொருளைப் பற்றிச் சொல்லப் போற?

பியூ.: வண்ணமடிக்க வரலாற்றில் நீண்டகாலமாகப் பயன்படுத்தப்பட்டு வரும் கோபால்ட் பத்தி இந்த வாரம் பார்க்கப் போறோம்.

பிப்.: கோபால்னு ஏதோ ஆளு பேரு மாதிரி இருக்கே.

பியூ.: கோபால் இல்லை, கோபால்ட். ‘ல்’லுக்கு அப்புறமா ஒரு ‘ட்’ இருக்கு, கவனிக்கலையா?

பிப்.: ஓ! கோபால்ட்டா. சரி சரி.

பியூ.: நீ ஓவியப் பயிற்சிக்குப் போயிருந்தீன்னா, கோபால்ட் பத்தித் தெரிஞ்சிருக்கும்.

பிப்.: நான் இன்னும் அந்த அளவுக்கு எல்லாம் போகலப்பா.

பியூ.: கோபால்ட் நீலத்தின் பல்வேறு வகைகள் ஓவியர்களிடையே புகழ்பெற்றிருக்கு.

பிப்.: அப்படியா, அதெல்லாம் என்ன?

பியூ.: கோபால்ட் நீலம், கோபால்ட் பச்சை, கோபால்ட் கருநீலம் என நீல நிறம் சார்ந்த பல்வேறு வகை வண்ணங்கள் கோபால்ட்டை அடிப்படையாகக் கொண்ட வண்ணங்கள். இவற்றை ஓவியர்கள் பல நூற்றாண்டுகளாகப் பயன்படுத்தி வந்திருக்காங்க.

பிப்.: அப்ப கோபால்ட்டுக்கு ஓவியர்கள் எல்லாம் சேர்ந்து பெரிய நன்றியே சொல்லணும்.

பியூ.: ஓவியத்துல மட்டுமில்ல, கண்ணாடிகள், ஜன்னல் கண்ணாடிகளில் நீல நிறத்தை ஏற்றுவதற்காக வெண்கலக் காலத்திலிருந்து கோபால்ட்டை பயன்படுத்திட்டு வர்றதா ஆராய்ச்சியாளர்கள் சொல்றாங்க.

பிப்.: வெண்கலக் காலமா, அது என்ன?

பியூ.: வெண்கல உலோகத்தை மனிதர்கள் பயன்படுத்த ஆரம்பித்த காலம்தான், வெண்கலக் காலம். அதாவது, இன்னைலேர்ந்து 3200 ஆண்டுகளுக்கு முன்பிருந்து 5000 ஆண்டுகளுக்கு முன்பு வரையிலான காலம்.

பிப்.: அவ்ளோ வருஷமா?

பியூ.: ஆமா, அப்ப நைல் நதிக்கரை நாகரிகத்தைச் சேர்ந்த எகிப்திய மக்கள் ஓவிய வண்ணங்களாகவும் நகைகளிலும் கோபால்ட்டை பயன்படுத்தியிருக்காங்க.

பிப்.: அப்ப அது கோபால்ட்னு தெரிஞ்சுதான் பயன்படுத்தினாங்களா?

பியூ.: இல்ல, ஸ்வீடன் வேதியியலாளர் ஜார்ஜ் பிராண்ட் 1735-ல் அதைத் தனியா பிரித்தெடுக்குற வரைக்கும், அது கோபால்ட்தான்னு யாருக்கும் தெரியலை.

பிப்.: அதானே பார்த்தேன்.

பியூ.: பிராண்ட் கண்டறிஞ்சு சொல்ற வரைக்கும் பிஸ்மத் தனிமத்தாலதான் நீல நிறம் கிடைக்கிறதா நம்பிட்டிருந்தாங்க. ஏன்னா இந்த இரண்டு தனிமங்களும் இயற்கை தாதுப் பொருளில் கலந்துதான் இருந்துச்சு.

பிப்.: எல்லா புகழும் விஞ்ஞானி பிராண்டைத்தானே சேரும்?

பியூ.: அப்படிச் சொல்ல முடியாது. 1802-ல் லூயி ழாக் தெனார்டு என்பவர்தான் கோபால்ட் அலுமினேட் என்ற கோபால்டின் சேர்மத்தைக் கண்டறிந்தார். அதுவே கோபால்ட் நீலம் என்ற வண்ணம்.

பிப்.: அப்ப ரெண்டு பேருக்கும் நன்றி சொல்வோம்.

பியூ.: வேதியியல் வரலாற்றில் கோபால்ட்டுக்கு ஒரு தனிச்சிறப்பு உண்டு.

பிப்.: அது என்ன?

பியூ.: வரலாற்றுக் காலத்துக்குப் பின்னால் கண்டறியப்பட்ட முதல் உலோகம் கோபால்ட். ஏனென்றால் இரும்பு, வெண்கலம், வெள்ளி, தங்கம், துத்தநாகம், பாதரசம், தகரம், காரீயம், பிஸ்மத் உள்ளிட்ட உலோகங்கள் வரலாற்றுக் காலத்துக்கு முன்பே கண்டறியப்பட்டுவிட்டன. அவற்றைக் கண்டறிந்த தனிமனிதர்கள் யாரென்று யாருக்கும் தெரியாது.

பிப்.: ம்ம்ம். சரி ஓவிய வண்ணங்கள், கண்ணாடிக்கு மட்டும்தான் கோபால்ட்டை பயன்படுத்தினாங்களா?

பியூ.: இல்லை, பீங்கான், மை, பெயின்ட், வார்னிஷ் போன்றவற்றில் அடர் நீல நிறத்தைக் கொடுக்கவும் கோபால்ட் பயன்படுது.

பிப்.: கோபால்ட் பயன்கள் பெருசுதான்.

பியூ.: இன்னும் முடியலை பிப். இயற்கையாக காந்த ஆற்றலைப் பெற்றுள்ள ஒரு சில உலோகங்கள் அதிக வெப்பநிலையில் காந்த ஆற்றலை இழந்துவிடுகின்றன. ஆனா, அந்த நிலையிலும்கூட கோபால்ட் காந்த ஆற்றலை இழக்கிறதில்லை.

பிப்.: இது ரொம்ப வித்தியாசமா
இருக்கே.

பியூ.: கடைசியா முக்கியமான விஷயம் ஒன்றைச் சொல்லி முடிக்கிறேன். உயிரினங்களின் உடலுக்கு அத்தியாவசியத் தேவைகளில் ஒன்றான கோபாலமின் என்ற வேதிப்பொருள், முக்கியமான துணைநொதியூக்கி. இதற்கு இன்னொரு பெயர் வைட்டமின் பி 12.

பிப்.: அப்போ மனுசங்க ஆரோக்கியமா வாழ்றதுக்கும் கோபால்ட் பயன்படுதுன்னு சொல்லு.

தொடர்புக்கு: valliappan@thehindutamil.co.in