கோடம்பாக்கம் சந்திப்பு: இரட்டை மகிழ்ச்சி!

இரட்டை மகிழ்ச்சி!

கல்வி உதவி வழங்கும் விழாவில் வரைவு தேசியக் கல்விக் கொள்கையைக் கடுமையாக விமர்சித்துப் பேசினார் சூர்யா. இதற்கு கமலஹாசன், சீமான், பா.இரஞ்சித் உள்ளிட்ட பலரும் ஆதரவு தெரிவித்து வருகிறார்கள். சூர்யாவுக்கு மகிழ்ச்சி அளிக்கும் மற்றொரு விஷயம், கே.வி.ஆனந்த் இயக்கத்தில், மோகன்லால் பிரதமராகவும் அவரது முக்கிய மெய்க்காப்பாளராக சூரயாவும் நடித்திருக்கும் ‘காப்பான்’ படத்தின் இசை அவரது பிறந்தநாளை முன்னிட்டு ஜூலை 21-ம் தேதி வெளியாகிறது.

தனுஷ் தரும் உறுதி

‘வடசென்னை’ படத்தில் தனுஷ் ஏற்று நடித்த அன்பு கதாபாத்திரம் அவரது ரசிகர்களைத் தாண்டியும் பரவலாகப் பாராட்டப்பட்டது.   ‘வடசென்னை’ படத்தை மூன்று பாகங்களாக மட்டுமே வெளியிட முடியும் என்று வெற்றிமாறனும் தனுஷும் முதலில் கூறியிருந்தனர். ஆனால், இரண்டாம் பாகத்துடன் படத்தை முடித்துவிட முடிவு செய்திருந்தனர். இதற்கிடையில் ‘வடசென்னை 2’ படம் கைவிடப்பட்டதாகச் சமூக வலைத்தளங்களில் செய்திகள் பரவின. இதை அறிந்த தனுஷ் தனது ட்விட்டர் பக்கத்தில் ‘ரசிகர்கள் வடசென்னை 2’ படம் பற்றிய வதந்திகளை நம்ப வேண்டாம். அப்படத்தின் படப்பிடிப்பு தொடர்ந்து நடந்து வருகிறது’ என்று உறுதி அளித்து இருக்கிறார். ‘வடசென்னை 2’ படத்தின் 30 நிமிடக் காட்சிகளை முதல் பாகப் படப்பிடிப்பின்போதே வெற்றிமாறன் படமாக்கிவிட்டார் என்பது குறிப்பிடத்தக்கது.

‘பேட்ட’ படத்துக்குப் பின்

‘பேட்ட’ படத்தைத் தொடர்ந்து தனுஷை இயக்கவிருக்கும் கார்த்திக் சுப்பராஜ், அதற்கான திரைக்கதைப் பணிகளை முடித்துவிட்டார். இதற்கிடையில் தனது ‘ஸ்டோன் பெஞ்ச்’ நிறுவனம் மூலம் கதாநாயகிகளை மையப்படுத்தி இரண்டு புதிய படங்களைத் தயாரிக்கிறார். ஒரு படத்தில் கீர்த்தி சுரேஷ் முதன்மைக் கதாபாத்திரத்தில் நடிக்க, அதை அறிமுக இயக்குநர் ஈஸ்வர் இயக்குகிறார். மற்றொன்றில் ஐஸ்வர்யா ராஜேஷ் நடிக்க, ‘இது வேதாளம் சொல்லும் கதை’ படத்தை இயக்கி முடித்திருக்கும் ரதீந்திரன் ஆர்.பிரசாத் அந்தப் படத்தை இயக்கவிருக்கிறார்.

ரஹ்மான் இசையில் விக்ரம்!

இயக்குநர்அஜய் ஞானமுத்து, ‘டிமாண்ட்டி காலனி’, ‘இமைக்கா நொடிகள்’ ஆகிய இரண்டு வெற்றிப் படங்களைத் தந்தவர். மூன்றாவதாக விக்ரம் நடிக்கும் படத்தை அவர் இயக்குகிறார்.  லலித்தின் 7 ஸ்கிரீன் ஸ்டுடியோ, வயாகாம் 18 ஸ்டுடியோ இணைந்து தயாரிக்கும் இந்தப் படத்துக்கு இசை அமைக்கிறார் ஏ.ஆர்.ரஹ்மான். ஏற்கெனவே ஷங்கர் இயக்கத்தில் விக்ரம் நடித்த ‘ஐ’, மணிரத்னம் இயக்கிய ‘ராவணன்’ ஆகிய படங்களுக்கு இசையமைத்த ரஹ்மான், இப்போது விக்ரமின் 58-ம் படத்தில் மீண்டும் இணைந்திருக்கிறார். ஆக்‌ஷன் திரில்லர் படமாக உருவாகும் இதில் ஒரு பாடலையும் பாடுகிறார் விக்ரம்.

இந்தியனில் இணைந்த இருவர்

கடந்த ஜனவரில் அறிவிக் கப்பட்ட ‘இந்தியன் 2’ படத்தைத் தனது கடைசி படமாக குறிப்பிட்டிருந்தார் கமல். தற்போது அடுத்தடுத்து பல படங்களில் நடிக்க அவர் முடிவு செய்திருக்கும் நிலையில், ‘இந்தியன் 2’ படத்துக்குமுன் அறிவிக்கப்பட்ட ‘தலைவன் இருக்கிறான்’ படத்தை ரஹ்மான் இசையுடன் தற்போது தொடங்கியிருப்பதாகக் கூறிருக்கிறார்கள். இதற்கிடையில் ஷங்கரின் ‘இந்தியன் 2’ படத்தில் கமல் ஜோடியாக காஜல் அகர்வால் நடித்தாலும், பிரியா பவானி சங்கர்,  ஐஸ்வர்யா ராஜேஷ் ஆகிய இரண்டு கதாநாயகிகள் புதிதாக இணைந்திருக்கிறார்கள் என்ற தகவல் கிடைக்கிறது. இதில் ப்ரியா ஏற்க இருப்பது எதிர்மறைக் கதாபாத்திரம் எனத் தகவல் கசிக்கிறது.