கலக்கல் ஹாலிவுட்: அந்நியருடன் ஒரு பயணம்!

மெரிக்க எழுத்தாளர் சார்லஸ் மார்ட்டினின் பிரபல நாவலைத் தழுவி எடுக்கப்பட்டிருக்கிறது ‘தி மவுண்ட்டன் பிட்வீன் அஸ்’ திரைப்படம். அக்டோபர் 20-ம் தேதி, வெளியாகவிருக்கும் இந்தப் படத்தில் இட்ரிஸ் எல்பா, கேட் வின்ஸ்லெட் இருவரும் முக்கியக் கதாபாத்திரங்களில் நடித்திருக்கின்றனர்.

டாக்டர் பென் பாஸ் என்ற அறுவை சிகிச்சை நிபுணர் கதாபாத்திரத்தில் நடிகர் இட்ரிஸ் எல்பா நடித்திருக்கிறார். கேட் வின்ஸ்லெட் , அலெக்ஸ் மார்ட்டின் என்ற ஒளிப்படப் பத்திரிகையாளர் கதாபாத்திரத்தில் நடித்திருக்கிறார். இவர்கள் இருவர் செல்ல வேண்டிய விமானம் எதிர்பாராத விதமாக ரத்தாகிறது. டாக்டர் பென்னுக்கு ஒரு மருத்துவ மாநாட்டுக்கும் அலெக்ஸ் தன்னுடைய திருமணத்துக்கும் அவசரமாகச் செல்ல வேண்டியிருப்பதால், இருவரும் சேர்ந்து ஒரு தனி விமானத்தில் பயணிக்கத் தீர்மானிக்கின்றனர். ஆனால், அந்த விமானம் ஒரு பனி மலையில் மோதி விபத்துக்குள்ளாகிறது. இவர்கள் இருவரும் அந்த மலையிலிருந்து பல நூறு மைல்களைக் கடந்து பயணம் செய்ய வேண்டியிருக்கிறது. பனிமலைப் பயணத்தில் எதிர்கொள்ளும் பல சவால்களைக் கடந்த இரண்டு அந்நியர்களும் அவர்கள் செல்ல வேண்டிய இடத்துக்கு உயிருடன் சென்றார்களா என்பதுதான் ‘தி மவுண்ட்டன் பிட்வீன் அஸ்’. ஹானி அபு அஸ்ஸாத் இந்தப் படத்தை இயக்கியிருக்கிறார். இந்தப் படத்தின் திரைக்கதையை கிரிஸ் வெயிட்ஸ், ஜெ. மில்ஸ் குட்லோ இருவரும் இணைந்து எழுதியிருக்கின்றனர். “ பார்வையாளர்களைச் சில்லிட வைக்கும் அனுபவமாகப் படம் இருக்கும்” என்கிறார் இயக்குநர்.