கோலிவுட் கிச்சடி: அஜித்தின் ‘துருவன்’

மகாபாரதத்தில் ஒரு முக்கிய கதாபாத்திரம் ‘துருவன்’. இதையே அஜித்தின் 57-வது படத்துக்குத் தலைப்பாகச் சூட்ட படக்குழு பரிசீலித்துவருகிறதாம். தற்போது இந்தப் படத்தின் படப்பிடிப்பு ஆஸ்திரிய நாட்டின் தென் பகுதியான கரிந்தியா என்ற நகரில் நடந்துவருகிறது. ஆல்ப்ஸ் மலை மற்றும் ஏரிகள் அடங்கிய ரம்மியமான பகுதி அது. இந்தப் படத்தில் எஃப்பிஐ ஏஜெண்ட்டாக அஜித் நடிக்கிறார். இந்தப் படத்தில் காஜல் அகர்வாலும் அக்‌ஷரா ஹாசனும் நடிக்கவிருக்கிறார்கள்.

சூப்பர் ஸ்டாருடன் ஆர்யா!

தமிழ் சினிமாவின் தற்போதைய ‘காதல் மன்னன்’ என்று பெயரெடுத்த ஆர்யாவுக்கு கடந்த 2013-ல் வெளியான 'ராஜா ராணி' படத்துக்குப் பிறகு வெளியான படங்கள் எதுவும் சரிவர ஓடவில்லை. இந்நிலையில் அவர் ‘மஞ்சப்பை' இயக்குநர் ராகவன் இயக்கிவரும் 'கடம்பன்' படத்தில் நடித்துவருகிறார். மேலும் அமீர் இயக்கத்திலும் அவர் ஒரு படத்தில் நடிக்கவிருக்கிறார் என்று செய்திகள் வெளியாகியிருக்கின்றன.

இந்நிலையில் மலையாள சூப்பர் ஸ்டார் மம்மூட்டி நடித்துவரும் ‘தி கிரேட் ஃபாதர்' என்ற மலையாளப் படத்தில் ஆர்யா முக்கிய கதாபாத்திரத்தில் நடிக்கவுள்ளார். தந்தை மகளாக மம்மூட்டி, சாரா நடித்துவரும் இந்த படத்தை ஆர்யா, பிரித்விராஜ், சந்தோஷ் சிவன், ஷாஜி நடேசன் ஆகியோரின் ‘ஆகஸ்ட் சினிமா' என்ற நிறுவனம் தயாரிக்கின்றது.

அரசியல் சீசன்

‘ஜோக்கர்’ படத்துக்குக் கிடைத்த வெற்றியைத் தொடர்ந்து தற்போது அரசியல் படங்கள் வரிசை கட்டும் என்று எதிர்பார்க்கப்படுகிறது. இதை உண்மையாக்குவதுபோல ‘காக்கா முட்டை’ படப்புகழ் மணிகண்டன் தனது அடுத்த படம் ஒரு அரசியல் கதை என்பதை அறிவித்திருக்கிறார். மணிகண்டன் இயக்கத்தில் தயாராகியிருக்கும் ‘குற்றமே தண்டனை’ விரைவில் வெளியாகவிருக்கிறது. விஜய்சேதுபதி, ரித்திகா சிங் நடிப்பில் தற்போது இயக்கிவரும் ‘ஆண்டவன் கட்டளை’ படத்தின் வேலைகளும் இறுதிக் கட்டத்தை எட்டிவிட்டன. இந்நிலையில்தான் மணிகண்டன், விவசாயத்தைப் பற்றிய அரசியலைப் பேசும் படமொன்றை இயக்கவிருப்பதாக அறிவித்திருக்கிறார். இந்தப் படத்துக்கு ‘கடைசி விவசாயி’ என்று தலைப்பு வைத்திருக்கிறார். 70 வயது முதியவர் கதாபாத்திரம் ஒன்றை மையமாக வைத்து விவசாய அரசியலைப் பேசப்போகிறார்களாம்.

முதல் முறையாக…

‘வருத்தப்படாத வாலிபர் சங்கம்’, ‘ரஜினி முருகன்’ படங்களை இயக்கிய பொன்ராம் இயக்கத்தில் மீண்டும் நடிக்கிறார் சிவகார்த்திகேயன். இந்தப் படத்தில் சிவகார்த்திகேயன் ஜோடியாக சமந்தா முதல்முறையாக நடிக்கிறார். “இந்தப் படத்தில் பக்கத்து வீட்டுப் பெண் போன்ற இயல்பான கேரக்டரில் சமந்தா நடிக்கவுள்ளார். மேலும் எனது முந்தைய படங்களின் கதாநாயகிகள் போன்ற லுக்கில் அவர் இருந்தாலும் இந்தப் படத்தில் அவர் நகரத்துப் பெண்ணாக நடிக்கவுள்ளார். அவருடைய புதிய, வித்தியாசமான அவதாரத்தை ரசிகர்கள் இந்தப் படத்தில் ரசிக்கலாம்” என்று கூறியிருக்கிறார் இயக்குநர் பொன்ராம்.

வெற்றி மேல் வெற்றி

கடந்த வெள்ளியன்று வெளியான ‘தர்மதுரை' உட்பட வரிசையாக வெற்றிமேல் வெற்றியைக் கொடுத்துவருகிறார் விஜய் சேதுபதி. இவரது நடிப்பில் அடுத்து வெளியாகவிருக்கும் படம் ‘றெக்க’. ரத்தின சிவா இயக்கிவரும் இந்தப் படத்தில் கும்பகோணத்து இளைஞராக நடிக்கிறார் விஜய் சேதுபதி. அவரது காதலியாகவும் மதுரைப் பெண்ணாகவும் லட்சுமி மேனன் நடித்திருக்கிறார். இவர்களோடு சதீஷ், கே.எஸ்.ரவிக்குமார், கிஷோர், சிஜா ரோஸ், ஹரீஷ் உத்தமன், கபீர் சிங், ரஞ்சனி, மீரா கிருஷ்ணன் என ஒரு வணிகப் படத்துக்குத் தேவையான நட்சத்திர பட்டாளம் படத்தில் இணைந்திருக்கிறது. இந்தப் படத்தின் வெளியீட்டு உரிமையைக் கைப்பற்றியிருக்கும் சிவபாலன் பிக்சர்ஸ் வரும் ஆயுதபூஜை தினத்தன்று 600 திரையரங்குகளில் வெளியிடவிருக்கிறார்களாம்.