கோலிவுட் கிச்சடி: ஜாக்கியுடன் இணையும் ரஜினி?

ஜாக்கியுடன் இணையும் ரஜினி?

ரஜினி நடித்துள்ள ‘கபாலி' இம்மாதம் வெளியாகவுள்ள நிலையில் அவர் நடித்துவரும் எந்திரன் படத்தின் இரண்டாம் பாகமான '2.0' படத்தின் படப்பிடிப்பும் விறுவிறுப்பாக நடைபெற்றுவருகிறது. இந்நிலையில் பிரபல மலேசிய தொழிலதிபரும் படத் தயாரிப்பாளருமான முகமது ரஃபீஸி என்பவர் ‘தி சினி சகா’ (The Chini Saga) என்ற படத்தை சீனம், ஆங்கிலம், தமிழ் ஆகிய மொழிகளில் தயாரிக்க இருப்பதாகவும் இதில் ரஜினிகாந்த், ஜாக்கிசான் ஆகியோர் நடிக்கவிருப்பதாகவும் மலேசியப் பத்திரிகைகளில் செய்தி வெளியாகியிருக்கிறதாம்.

இவர்களோடு பாலிவுட்டின் சோனம் கபூர் இணைந்து நடிக்க ஒப்புக்கொண்டிருப்பதாகவும் செய்தி. எந்திரன் இரண்டாம் பாகம் முடிந்ததும் இந்தப் படம் பற்றிய அறிவிப்பு இருக்கும் என்றும் தகவல்கள் கிடைக்கின்றன.

‘லொள்ளு சபா’ ஜீவாவின் அட்டகாசம்!

ரஜினியின் தீவிர ரசிகர் ‘லொள்ளு சபா’ ஜீவா. ‘கோச்சடையான்’ படத்தில் ரஜினிக்காகச் சில காட்சிகளில் பர்ஃபாமென்ஸ் கேப்சரிங்’ முறையில் நடித்துக்கொடுத்தவர். அவர் கதாநாயகனாக நடிக்கும் படம் ‘ஆரம்பமே அட்டகாசம்’. இதில் அவருக்கு ஜோடியாக அறிமுகமாகிறார் சங்கீதா பட். இவர் கன்னடப் படவுலகில் முன்னணிக் கதாநாயகி. சென்னை, கேரளா, ஹைதராபாத் ஆகிய இடங்களில் உருவாகிவரும் இது, காதலும் நகைச்சுவையும் கலந்த படம்.

கதை, திரைக்கதை எழுதி இயக்குகிறார் ரங்கா. இவர் அஜித்தின் தீவிர ரசிகராம். இதனால் அஜித் நடித்த ‘ஆரம்பம்’, ‘அட்டகாசம்’ ஆகிய படங்களின் தலைப்புகளை இணைத்து இப்படியொரு தலைப்பை வைத்தேன் என்கிறார். இவர் இயக்கியுள்ள ‘நாய்க்குட்டி’ விரைவில் வெளியாகவிருக்கும் நிலையில் அடுத்த படத்துக்கான வாய்ப்பை அள்ளியிருக்கிறார் ரங்கா.

‘ரம்’ ‘ ரெமோ’, அஜித்தின் 57-வது படம் உட்படப் பல தமிழ்ப் படங்களுக்கு இசையமைத்துவரும் அனிருத் இப்போது சர்வதேச அரங்கில் கால் பதிக்கிறார். இதற்காக அமெரிக்காவைச் சேர்ந்த பாடலாசிரியர் டிப்லோவுடன் ஒப்பந்தம் செய்துகொண்டிருக்கிறாராம்.

இந்தச் செய்தியை டிப்லோ தனது ட்விட்டர் பக்கத்தில் தெரிவித்திருக்கிறார். டிப்லோவின் வரிகளில் சர்வதேச ஆல்பம் ஒன்றை வெளியிடத்தயாராகி வருகிறார் என்கிறார்கள் அனிருத் வட்டாரத்தில்.

பரபரப்பான ஃபர்ஸ்ட் லூக்

இரண்டு படங்களின் ஃபர்ஸ்ட் லுக் போஸ்டர்கள் ரசிகர்களை தற்போது கவர்ந்து வருகின்றன. முதலாவது ‘சபாஷ் நாயுடு’ படத்தில் கமலின் தோற்றம். அமெரிக்காவில் படப்பிடிப்பு நடந்துவரும் நிலையில் படப்பிடிப்புத் தளத்தில் எடுக்கப்பட்ட ஒரு புகைப்படத்தை மாதவன் தனது ட்விட்டரில் பகிர அது இணையத்தில் வேகமாகப் பரவிவருகிறது.

இரண்டாவது பாக்கியராஜ் கண்ணன் இயக்கத்தில் 24 ஏ.எம் நிறுவனம் தயாரிக்கும் ‘ரெமோ’ படத்தில் சிவகார்த்திகேயனின் ஃபர்ஸ்ட் லுக் தோற்றம். ‘அந்நியன்’ படத்தில் சியான் விக்ரம் ஏற்ற பன்முக ஆளுமைச் சிக்கல் கொண்ட கதாபாத்திரம் ‘ரெமோ’. அதையே இந்தப் படத்தின் தலைப்பாக வைத்திருந்ததால் இயக்குநர் ஷங்கரை வைத்து இந்த போஸ்டரை வெளியிட்டிருக்கிறார்கள்.

விறுவிறு ரித்திகா

அறிமுக நாயகி ரித்திகா மாதவனுடன் இணைந்து நடித்த ‘இறுதிச் சுற்று’ ரசிகர்கள், விமர்சகர்கள் ஆகிய இரண்டு தரப்பிலும் வரவேற்பைப் பெற்றது. நிஜ வாழ்க்கையில் குத்துச்சண்டை வீராங்கனையான இவரது நடிப்புக்கு தேசிய அளவிலும் அங்கீகாரம் கிடைத்தது. ‘காக்கா முட்டை’ பட இயக்குநர் மணிகண்டன் அடுத்து இயக்கும் ‘ஆண்டவன் கட்டளை’ படத்தில் விஜய் சேதுபதி ஜோடியாக ரித்திகா தற்போது நடித்துவருகிறார்.

ரித்திகாவுக்கு மேலும் வாய்ப்புகள் குவிகின்றன. கன்னடத்தில் வெளியாகிப் பெரும் வெற்றிபெற்ற படம் ‘சிவலிங்கா’. இதைத் தமிழ், தெலுங்கு மொழிகளில் மறு ஆக்கம் செய்து இயக்கவிருக்கிறார் பி.வாசு. இந்தப் படத்தில் ராகவா லாரன்ஸுக்கு ஜோடியாக நடிக்க கால்ஷீட் கொடுத்திருக்கிறார் ரித்திகா சிங்.

பிந்துவும் பேய்

தமிழ் சினிமாவில் கிட்டத்திட்ட எல்லாக் கதாநாயகிகளும் பேய்களாக நடித்துவிட்டார்கள். இந்தப் பட்டியலில் சேராமல் இருந்தார் பிந்து மாதவி. விரைவில் வெளியாகவிருக்கும் ‘ஜாக்சன் துரை’ படத்தில் சிபிராஜூக்கு ஜோடியாக நடித்திருந்தாலும் பல காட்சிகளில் மிரட்டலான பேயாக வருகிறாராம்.

- ‘ ரெமோ’ படத்தில் நர்ஸ் தோற்றத்தில் சிவகாத்திகேயன்