கோடம்பாக்கம் சந்திப்பு: பிறந்தநாள் சிலம்பம்!

‘காத்தாடி’, ‘காலக்கூத்து’ படங்களுக்குப் பின் தன்ஷிகா நடித்துவந்த ‘கிட்னா’ திரைப்படம் தாமதமாகிவருகிறது. இதற்கிடையில் கன்னடப் படம் ஒன்றில் நடித்துக்கொண்டே ‘வாலுஜடா’ என்ற தெலுங்குப் படத்திலும் நடித்துவரும் தன்ஷிகா சமீபத்தில் சென்னையில் தனது பிறந்தநாளை வித்தியாசமாகக் கொண்டாடினார். தனது சிலம்பாட்ட குருவான பாண்டியன் மாஸ்டர் முன்னிலையில் கேக் வெட்டிய தன்ஷிகா, அங்கிருந்த மாணவர்கள் கேட்டுக்கொண்டதற்கு இணங்க, அட்டகாசமாக 1 மணிநேரம் சிலம்பம் சுழற்றி அசர வைத்தாராம். தன்ஷிகாவின் சிலம்பத் திறமையைப் பயன்படுத்திக்கொள்ளும்படி இயக்குநர்களுக்கு இப்படிக் கோரிக்கை வைத்திருப்பார் எனத் தோன்றுகிறது.

நெட்டிசன்களின் பாராட்டு!

‘நீலம்’ படத்தின் மூலம் இயக்குநராக அறிமுகமான வெங்கடேஷ் குமார் ஜி இயக்கும் புதிய படம் ‘சீறும் புலி’. விடுதலைப்புலிகள் இயக்கத்தின் தலைவர் வேலுப்பிள்ளை பிரபாகரனின் வாழ்க்கை வரலாற்றுப்படமாக உருவாகிவருகிறது இந்தப் படம். இதில் பிரபாகரனின் கதாபாத்திரத்தை ஏற்றிருக்கிறார் பாபி சிம்ஹா.

ஸ்டுடியோ 18 புரொடக்ஷன்ஸ்  தயாரிக்கும் இப்படத்தின் ஃபர்ஸ்ட் லுக் போஸ்டர் பிரபாகரனின் 64-வது பிறந்தநாளை ஒட்டி சமீபத்தில் வெளியிடப்பட்டுள்ளது. அதைக் கண்ட நெட்டிசன்கள், ‘பாபி சிம்ஹா, பிரபாகரன் வேடத்துக்குப் பொருத்தமாக இருப்பதாகவும் அவர் பிரபாகரனைப் போல் எப்படி நடித்திருப்பார் என்பதைக் காண ஆவலாக இருப்பதாகவும்’ கருத்துகளை வெளியிட்டு வருகிறார்கள். புலியைத் தயாரிப்பில் இருக்கும்வரை கண்டுகொள்ள மாட்டார்களோ!

கள்ளபார்ட் நடிகர்!

‘என்னமோ நடக்குது’, ‘அச்சமின்றி’ ஆகிய படங்களை விறுவிறுப்பான திரைக்கதைகளுடன் கொடுத்துக் கவனிக்க வைத்த இயக்குநர் பி.ராஜபாண்டியின் இயக்கத்தில் அடுத்து நடித்துக்கொண்டிருப்பவர் அரவிந்தசாமி. அவருக்கு ஜோடி ரெஜினா காசன்ட்ரா.

விக்ரம் நடிப்பில் வெளியான ‘ஸ்கெட்ச்’ படத்தின் தயாரிப்பாளர்களான மூவிஸ் ப்ரேம் தயாரித்துவரும் இந்தப் படத்துக்கு ‘கள்ளபார்ட்’ என்று தலைப்பு வைத்து அதிரடியாக 40 நாட்கள் படப்பிடிப்பை முடித்துவிட்டார் இயக்குநர். ‘கள்ளபார்ட்’ என்ற தலைப்பைக் கேட்டு கதை கேட்க அழைத்த அரவிந்தசாமி, ஏற்கெனவே ஒப்புக்கொண்ட இரண்டு படங்களை ஓரம்கட்டிவிட்டு, இந்தப் படத்தில் முழு மூச்சாக நடித்துவருகிறாராம். படத்துல ‘நல்லபார்ட்’டும் நீங்கதானா?

நேரம் குறைவு!

முப்பது நாட்களில் தனக்கு இறப்பு நிச்சயம் என்பதைத் தெரிந்துகொண்டுவிடுகிறான் கதாநாயகன். இந்தக் குறைவான நாட்களில் ஒவ்வொரு நொடியையும் நரகமாக உணரும் அவன், திடீரென ஒவ்வொரு நொடியையும் வரமாக உணரத் தொடங்குகிறான். இந்த மாற்றம் எப்படி நடந்தது, அவன் சாவை முத்தமிட்டானா, இல்லையா என்பதை ‘டைம் இல்ல’ என்ற தலைப்பில் இயக்கிக்கொண்டிருக்கிறார் அறிமுக இயக்குநர் சதீஷ் கர்ணா.

கதையைக் கேட்டு வியந்து, தாமே கதாநாயகனாக நடித்து படத்தையும் தயாரிக்கிறார் மனு பார்த்திபன் என்ற புதுமுக நாயகன். இவருக்கு ஜோடியாக மோனி சின்னக்கோட்லா என்ற பெங்களூர் மாடல் அறிமுகமாகிறார். படத்தோட நேரமும் குறைவா இருந்தால் ஓகேதான்!

ரசிகர்கள் இரண்டுபட்டால்..

இயக்குநர் விக்னேஷ் சிவனுடன் எடுத்துக்கொள்ளும் நெருக்கமான செல்பி படங்களைத் தனது சமூக வலைத்தளத்தில் உடனுக்குடன் பதிந்து ரசிகர்களை டென்ஷனாக்குவதில் நயன்தாரா துணிச்சல்காரர்.  தன்னை நம்பி எழுதப்படும் கதைகளில் நடித்து அவ்வப்போது வெற்றி கொடுப்பதால் ‘லேடி சூப்பர் ஸ்டார்’ என்று அழைக்கப்படுவதை ரகசியமாக ரசிப்பவர். தனி ஆவர்த்தனப் படங்களுக்கு நடுவே, பாக்ஸ் ஆபீஸின் முன்னணிக் கதாநாயகர்களோடு நடிக்க அதிரடியாகத் தன்னை தயார்படுத்திக்கொள்வதிலும் அவரை அடித்துக்கொள்ள ஆள் இல்லை என்ற நிலை.

தற்போது அஜித் ஜோடியாக ‘விஸ்வாசம்’ படத்தில் நடித்து முடித்திருப்பதால், விஜய் ரசிகர்கள் பொறுக்க மாட்டார்கள் அல்லவா? அதை ஈடுசெய்ய ஏ.ஜி.எஸ். என்டர்டெயின்மென்ட் நிறுவனத்தின் தயாரிப்பாக அட்லி இயக்கத்தில் விஜய் நடிக்கும் அவரின் 63-வது படத்தில் நயன்தாராவைக் கதாநாயகியாக உறுதிப்படுத்தியிருக்கிறார்கள். ரசிகர்கள் இரண்டுபட்டால் நயன்தாராவுக்குக் கொண்டாட்டம்!

லைகா மீது ரஜினிக்கு லைக்!

நேற்று ரிலீஸான ‘2.0’ திரைப்படம்,  அதிகத் திரையரங்குகளில் வெளியானதன் அடிப்படையில் ‘பாகுபலி’யின் சாதனையை மிஞ்சியிருக்கிறது. இந்தப் படத்தைத் தொடர்ந்து ரஜினி நடித்துவரும் ‘பேட்ட’ படம் பொங்கல் வெளியீடு என உறுதிப்படுத்தப்பட்டுள்ளதால் படத்தின் வெளியீட்டை டிசம்பர் 9-ம் தேதி நடத்துகிறார்கள்.

இந்த நிலையில் ‘பேட்ட’யின் உலகளாவிய விநியோக உரிமையை, பல ரஜினி படங்களைத் தயாரித்தவரான ‘கலைப்புலி’ எஸ்.தாணு வாங்கியிருப்பதாகத் தகவல்கள் தெரிவிக்கின்றன.  ‘பேட்ட’ படத்தைத் தொடர்ந்து ஏ.ஆர்.முருகதாஸ் இயக்கத்தில் ரஜினி நடிக்க இருக்கிறார் அதை லைகா நிறுவனமே தயாரிப்பதாகவும் நம்பகமான வட்டாரங்கள் தெரிவிக்கின்றன. சன் டிவி எதனால்  பின்வாங்கினார்களோ?