இயக்குநர் ஸ்ரீதர் தனது ‘சித்ராலயா’ பட நிறுவனத்தின் மூலம் எடுத்த சில படங்கள் அடுத்தடுத்து தோல்வி அடைந்தன. அதனால், பொருளாதார நெருக்கடிக்கு ஆளானார். ‘‘அதிலிருந்து மீள மக்கள் திலகம் எம்.ஜி.ஆரை வைத்து படம் எடுப்பதுதான் உனக்கிருக்கும் ஒரே வழி’’ என்று ஸ்ரீதரின் நெருங்கிய நண்பரும் இந்தி நடிகருமான ராஜேந்திர குமார் யோசனை கூறினார். அதைக் கேட்டு ஸ்ரீதர் முதலில் அதிர்ந்தார்.

ஏனென்றால், ‘அன்று சிந்திய ரத்தம்’ என்கிற தலைப்பில் படம் தயாரிக்கத் திட்டமிட்டு எம்.ஜி.ஆரை வைத்து சில காட்சிகளை எடுத்தார் ஸ்ரீதர். பின், அந்தப் படம் நின்று போனது. அதே நேரம், புதுமுகங்களை வைத்து ‘காதலிக்க நேரமில்லை’ என்கிற வண்ணப்படத்தை எடுத்தார்.