2024இன் வைரல்கள்!

சமூக வலைதளங்களில் 2024இல் தமிழகத்தில் வைரலான சில நிகழ்வுகள்.

* ‘தமிழக வெற்றிக் கழகம்’ கட்சியைத் தொடங்கிய விஜயின் மாநாட்டு உரை, கொள்கை போன்றவை வரவேற்பையும் விமர்சனத்தையும் ஒருசேரப் பெற்றன.

* நடிகை நயன்தாராவின் வாழ்க்கை வரலாற்று ஆவணப் படம் தொடர்பாக நடிகர் தனுஷ் மீது குற்றச்சாட்டை முன்வைத்து நயன்தாரா வெளியிட்ட அறிக்கை சமூக ஊடகங்களில் அல்லோல கல்லோலப்பட்டது. திரைத் துறையைச் சேர்ந்த இருவருடைய மோதலை அவலாக்கி ருசி பார்த்தது சமூகவலைதள சமூகம்.

* ‘தல’ என்று அழைக்க வேண்டாம் என்று அன்பு கட்டளையிட்டிருந்த நடிகர் அஜித்தை அவருடைய ரசிகர்கள், ‘கடவுளே அஜித்தே..’ என ‘புரோமோட்’ செய்து அவஸ்தைப்படுத்தினார்கள். அதற்கும் ஒரு முற்றுப்புள்ளி வைத்ததுதான் அஜித் ஸ்பெஷல்.

* இந்த ஆண்டு ‘இந்தியன் 2’. ‘கங்குவா’ போன்ற படங்கள் சமூக ஊடகர்கள் கையில் சிக்கிச் சின்னாபின்னமாகின. இதற்குப் பதிலடி கொடுக்க சினிமா துறையினரும் புதுப்புது உத்திகளைக் கடைபிடிக்கத் தொடங்கியிருக்கிறார்கள்.

* 2024இல் ‘பால் டப்பா’ என்கிற அனிஷின் ‘காத்து மேல’, சாய் அபயங்கரின் ‘கட்சி சேர’, ‘ஆச கூட’, ‘அசல் கோளாறு’ பாடிய ‘பையா டேய்’ ஆகிய சுயாதீனப் பாடல்கள் வைரல் பேர்வழிகளுக்குத் தீனிப் போட்டன.

* இது யூடியூபர்களின் காலம். இந்த ஆண்டு நடைபெற்ற மக்களவைத் தேர்தலில் இளம் யூடியூபர் களின் தகவல் தொகுப்பு, பிரசார உத்திகள் சமூக ஊடகங்களில் சக்கைப்போடு போட்டன.

* மறைந்த எஸ்.பி.பாலசுப்பிரமணியம், மலேசியா வாசுதேவன், பவதாரிணியின் குரல்கள் இந்த ஆண்டு செயற்கை நுண்ணறிவுத் (ஏஐ) தொழில்நுட்பம் மூலம் மீட்டுருவாக்கம் செய்யப்பட்டன. இதற்கு வரவேற்பு இருந்தாலும், ஏஐயின் போக்கு அச்சத்தைத் தருவதாகவும் விமர்சனம் எழுந்தது.

* குழந்தைகளுக்கான பிரபல ‘சோட்டா பீம்’ கார்ட்டூனின் வசனம் ஒன்று சமூக வலைதளங்களில் வைரலானது. ‘சின் தபக் டம் டம்’ - என்கிற இந்த ஜாலி வசனம் திடீரென வீடியோ மீம் மெட்டீரியலானது.

* சுட்டீஸ் முதல் பாட்டீஸ் வரை வயது வித்தியாசம் இல்லாமல் திறமையைக் காட்டவும், பிடித்த துறையில் ‘இன்புளூயன்சர்’களாக மாறும் போக்கும் இந்த ஆண்டும் ‘டிரெண்’டிங்கில் நீடித்தது.

* கருவில் இருக்கும் குழந்தையின் பாலினத்தை வெளியிட்டது, பிரசவத்தின்போது வீடியோ எடுத்து வெளியிட்டது என யூடியூபர் இர்ஃபானை சர்ச்சைகள் சுற்றின. எல்லாவற்றுக்கும் ஒரு ‘மன்னிப்பை’க் கேட்டு அவர் எஸ்கேப் ஆனது தனிக்கதை.