நடப்பு விவகாரம்: ஆசியாவின் ‘ஆசியான்’ கதை!

முன் எப்போதும் இல்லாத ஒரு சிறப்பு, சில தினங்களுக்கு முன்பு நடைபெற்று முடிந்த குடியரசுத் தின விழாவுக்குக் கிடைத்திருக்கிறது. ஒரே நேரத்தில் ‘ஆசியான்’ என்றழைக்கப்படும் தென்கிழக்கு நாடுகளின் கூட்டமைப்பின் 10 நாடுகளைச் சேர்ந்த தலைவர்கள் குடியரசு தின விழாவில் சிறப்பு விருந்தினர்களாகப் பங்கேற்று சிறப்பித்ததுதான் அது. ‘ஆசியான்’ அமைப்புக்கும் இந்தியாவுக்குமான பேச்சுவார்த்தை உறவு ஏற்பட்டு 25 ஆண்டுகள் ஆனதன் நிறைவு ஆண்டு இது. அதன் ஒரு பகுதியாகத்தான் இந்த ஆண்டு குடியரசு தினவிழாவில் 10 நாட்டுத் தலைவர்களும் பங்கேற்றார்கள். ஆசியான் அமைப்பு என்பது என்ன? அதற்கும் இந்தியாவுக்கும் என்ன தொடர்பு?

தெற்காசியாவில் இந்தியா, பாகிஸ்தான், இலங்கை உள்ளிட்ட நாடுகள் அங்கம் வகிக்கும் ‘சார்க்’ என்ற அமைப்பு இருக்கிறதல்லவா? இதைப் போலவே தென் கிழக்காசியாவில் உள்ள நாடுகள் சேர்த்து உருவாக்கிய அமைப்புதான் ‘ஆசியான்’. இதை தென் கிழக்காசிய நாடுகளின் கூட்டமைப்பு என்று அழைப்பார்கள். இந்தக் கூட்டமைப்பை இந்தோனேசியா, மலேசியா, பிலிப்பைன்ஸ், சிங்கப்பூர், தாய்லாந்து ஆகிய நாடுகள் இணைந்து 1967 ஆகஸ்ட் 8 அன்று உருவாக்கின. பின்னர் புரூனே (1987), வியட்நாம் (1995), மியான்மர், லாவோஸ், (1997), கம்போடியா (1999) ஆகிய நாடுகள் இந்தக் கூட்டமைப்பில் இணைந்தன.

பெரிய கூட்டமைப்புகளில் ஒன்று

பொருளாதார வளர்ச்சியை ஊக்கப்படுத்துதல், உறுப்பு நாடுகளிடையே சமூக மற்றும் பண்பாட்டு உறவுகளைப் பேணுதல், கிழக்காசிய பிராந்தியத்தில் அமைதியைப் பேணுதல், உறுப்பு நாடுகள் ஏனைய நாடுகளுடன் கலந்துரையாட வாய்ப்பை வழங்குதல் போன்றவை இந்தக் கூட்டமைப்பின் குறிக்கோள்களாக அறிவிக்கப்பட்டன. உலகில் உள்ள பெரிய கூட்டமைப்புகளில் ஆசியான் அமைப்பும் ஒன்று. உலகின் எட்டாவது மிகப் பெரிய பொருளாதார அமைப்பும்கூட. கூட்டமைப்பில் இடம்பெற்றுள்ள நாடுகள் 45 லட்சம் கி.மீ. நிலப்பரப்பைக் கொண்டிருக்கின்றன. உலக மொத்தப் பரப்பளவில் இது 3 சதவீதம். இந்தப் பிராந்தியத்தில் மக்கள்தொகை சுமார் 60 கோடி.

சரி, இந்தியாவுக்கும் ஆசியான் அமைப்புக்கும் என்ன தொடர்பு? ஆசியான் அமைப்பு பத்து நாடுகளோடு தொடர்பை வைத்துக்கொள்ளவில்லை. சுதந்திரமான வர்த்தகத்திலும் பொருளாதாரத்திலும் இணைந்து செயல்பட வசதியாக பிற நாடுகளுடனும் தொடர்பு வைத்துக்கொண்டன. அந்தவகையில் ‘ஆசியான் பிளஸ் த்ரீ’ என்ற அந்தஸ்தை சீனா, ஜப்பான், தென்கொரியா என மூன்று நாடுகளுக்கு ஆசியான் அமைப்பு வழங்கியது. பின்னர் இந்த எண்ணிக்கை ஆறாக உயர்ந்தது. இந்தியா, ஆஸ்திரேலியா, நியூசிலாந்து நாடுகள் கூடுதலாக இடம்பெற்றன. இதன்படி 1992-ம் ஆண்டிலிருந்து ஆசியான் அமைப்போடு இந்தியாவுக்கு உறவு இருந்துவருகிறது. ஆசியான் அமைப்பின் உச்சி மாநாடுகளில் இந்திய பிரதமர் பங்கேற்பதும் அன்று முதல் தொடர்கிறது.

அந்த உறவு தொடங்கி 25 ஆண்டுகள் நிறைவு பெறுவதையொட்டிதான் இந்த ஆண்டு குடியரசு தின விழாவில் ஆசியான் அமைப்பைச் சேர்ந்த 10 நாடுகளின் தலைவர்களும் சிறப்பு விருந்தினர்களாகப் பங்கேற்றார்கள்.

விருந்தினர்களின் வந்தனம்

இந்தியா குடியரசாக மலர்ந்த 1950-ம் ஆண்டிலிருந்தே வெளிநாடுகளைச் சேர்ந்த தலைவர்கள் சிறப்பு விருந்தினர்களாகப் பங்கேற்கும் நடைமுறை இருந்துவருகிறது. இந்த ஆண்டு குடியரசுத் தினத்தில்தான் 10 நாடுகளைச் சேர்ந்த தலைவர்கள் ஒருசேர பங்கேற்ற நிகழ்வு நடந்திருக்கிறது.

1950-ம் ஆண்டு குடியரசு தின விழாவில் முதன்முதலாக சிறப்பு விருந்தினராகப் பங்கேற்றார் அப்போதைய இந்தோனேசிய அதிபர் சுகர்னோ.

1952, 1953, 1966 என இந்த மூன்று ஆண்டுகளில் சிறப்பு விருந்தினர்கள் பங்கேற்காத நிகழ்வுகளும் நடந்திருக்கின்றன.

இந்தியக் குடியரசு தின விழாவில் சிறப்பு விருந்தினராகப் பங்கேற்ற ஒரே பாகிஸ்தான் தலைவர் என்ற சிறப்பு மாலிக் குலாம் முகமதுவுக்கு உண்டு. 1955-ம் ஆண்டு இவர் பங்கேற்றார். ராஜபாதை அணிவகுப்பில் பங்கேற்ற முதல் வெளிநாட்டுத் தலைவரும் இவர்தான்.

1956 (ஜப்பான், பிரிட்டன்), 1968 (சோவியத் யூனியன், யுகோஸ்லேவேகியா), 1974 (இலங்கை, யுகோஸ்லேவேகியா) ஆகிய ஆண்டுகளில் இரண்டு வெளிநாட்டுத் தலைவர்கள் குடியரசு தின விழாவில் சிறப்பு விருந்தினர்களாகப் பங்கேற்றிருக்கிறார்கள்.

இனவெறி பிரச்சினை முடிவுக்கு வந்த பிறகு, 1994-ம் ஆண்டு தென்னாப்பிரிக்காவின் அதிபராக நெல்சன் மண்டேலா பொறுப்பேற்ற உடன் 1995-ம் ஆண்டு இந்தியக் குடியரசு தின விழாவில் சிறப்பு விருந்தினராக அழைக்கப்பட்டார்.

இந்தியக் குடியரசு தின விழாவில் சிறப்பு விருந்தினராகப் பங்கேற்ற ஒரே அமெரிக்க அதிபர் பராக் ஒபாமா. இவர் 2015-ம் ஆண்டு பங்கேற்றார்.

கருத்தைப் பதிவு செய்ய

லேட்டஸ்ட் அப்டேட்களுக்கு இந்து தமிழ்திசை வாட்ஸ்அப் சேனலை Follow செய்யுங்கள்...
Follow