தெருச்சண்டை விவகாரம்: ஸ்டோக்ஸ், ஹேல்ஸ் இங்கிலாந்து அணியிலிருந்து நீக்கம்

பிரிஸ்டல் மதுபான விடுதியில் மது அருந்தி விட்டு தெருவில் இருவருடன் ஸ்டோக்ஸ் சண்டையிட்டதாகக் கைது செய்யப்பட்டார், மேலும் இது குறித்த வீடியோவையும் தி சன் வெளியிட்டது, இதனையடுத்து சர்வதேச போட்டிகளுக்கு பென் ஸ்டோக்ஸ் விசாரணை முடியும் வரை பரிசீலிக்கப் படமாட்டார் என்று ஸ்டோக்சை இங்கிலாந்து கிரிக்கெட் வாரியம் இடைநீக்கம் செய்துள்ளது.

இவருடன் இருந்த மற்றொரு இங்கிலாந்து அதிரடி வீரர் அலெக்ஸ் ஹேல்சும் அடுத்த அறிவிப்பு வரும் வரை சர்வதேசப் போட்டிகளுக்குத் தேர்வு செய்யப்படமாட்டார்.

இரண்டு பேரை பென் ஸ்டோக்ஸ் நடுத்தெருவில் அடித்து நொறுக்கியதாக வீடியோவில் பதிவானதையடுத்து அவர் மீது விசாரணையும், இங்கிலாந்த் கிரிக்கெட் வாரிய ஒழுங்கு நடவடிக்கைக்கும் உத்தரவிடப்பட்டுள்ளது.

நேற்று அறிவிக்கப்பட்ட இங்கிலாந்து அணியில் பென் ஸ்டோக்ஸ் துணைக் கேப்டனாக நியமிக்கப்பட்டிருந்தார், இந்நிலையில் ஆஷஸ் தொடரில் அவர் விளையாட முடியுமா என்பது விசாரணை முடிவில்தான் தெரியவரும்.

“பென் ஸ்டோக்ஸ், அலெக்ஸ் ஹேல்ஸ் இருவரும் இங்கிலாந்து அணியின் சர்வதேச போட்டிகளுக்கு பரிசீலிக்கப் பட மாட்டார்கள், இது அடுத்த அறிவிப்பு வரும் வரை செல்லுபடியாகும்” என்று இங்கிலாந்து கிரிக்கெட் வாரியம் தெரிவித்துள்ளது.