விராட் கோலி பிறந்த நாள்: ட்விட்டரில் கிரிக்கெட் வீர்ர்கள் வாழ்த்து

இந்திய அணியின் ஆக்ரோஷமான கேப்டன் விராட் கோலியின் பிறந்த நாளை முன்னிட்டு கிரிக்கெட் வீரர்கள் பலர் கோலிக்கு ட்விட்டரில் தங்களது வாழ்த்துகளை தெரிவித்தனர்.

இந்திய டெஸ்ட் கிரிக்கெட் அணியின் தலைவரும், இந்திய அணியின் ஆக்ரோஷமான ஆட்டக்காரருமான விராட் கோலி இன்று (சனிக்கிழமை) தனது 28வது பிறந்த நாளை கொண்டாடுகிறார்.

விராட் கோலியின் பிறந்த நாளை முன்னிட்டு இந்திய அணியின் கிரிக்கெட் அணியின் வீரர்கள் பலரும் ட்விட்டரில் விராத் கோலிக்கு தங்களது வாழ்த்துகளைத் தெரிவித்தனர்.

ட்விட்டரில் கோலிக்கு வாழ்த்துகளை தெரிவித்த வீரர்கள் விவரம்

இந்திய நட்சத்திர வீரர் சச்சின் டெண்டுல்கர் தனது ட்விட்டர் பக்கத்தில், "இந்திய அணியை வழி நடத்தும், நவீன கிரிக்கெட்டின் ‘கிங்’ கோலிக்கு பிறந்த நாள் வாழ்த்துகள். எப்போதும் நீங்கள் நீங்களாகவே இருங்கள் " என்று கூறியிருக்கிறார்.

இந்திய கிரிக்கெட் அணியின் முன்னாள் வீரர் முகமது கைஃப் தனது ட்விட்டர் பக்கத்தில், "தனது தொடர்ச்சியான ரன் குவிப்பால் லட்சக்கணக்கானவர்களுக்கு மகிழ்ச்சியை அளித்தவர் கோலி" என்று பதிவிட்டுள்ளார்.

இந்திய அணியின் பயிற்சியாளர் அனில் கும்ப்ளே தனது வாழ்த்தில், "பிறந்த நாள் வாழ்த்துகள் கோலி, இந்த வருடம் சிறந்த வருடமாக இருக்க வாழ்த்துகள். எல்லாவற்றிலும் சிறந்து விளங்கவும் வாழ்த்துகள்" எனவும், இந்திய கிரிக்கெட் அணி வீரர் சுரேஷ் ரெய்னா தனது ட்விட்டர் பக்கத்தில் " வருடம் முழுவதும் ஆரோக்கியத்துடனும், மகிழ்ச்சியுடனும் இருக்க பிறந்த நாள் வாழ்த்துகள்" என கூறியுள்ளார்.

இந்திய அணியின் அதிரடி ஆட்டக்காரர் வீரேந்திர சேவாக் தனக்கேயுரிய நகைச்சுவை பாணியில் தனது பிறந்த நாள் வாழ்த்தை கோலிக்கு தெரிவித்துள்ளார்.

மேலும் இந்திய டெஸ்ட் அணியின் துணை கேப்டன் ரஹானே, தென் ஆப்ரிக்க கிரிக்கெட் வீரர்கள், கோலியின் ரசிகர்கள் பலரும் தங்களது பிறந்தநாள் வாழ்த்துகளை கோலிக்குத் தெரிவித்துள்ளனர்.

ட்விட்டரில் கோலியின் பிறந்த நாளை முன்னிட்டு #weloveyoukholi #happybirthdaykholi என்ற ஹாஷ்டேக்கள் டிரண்டாகி உள்ளது.

28வது வயதை அடி எடுத்து வைத்துள்ள கோலி இதுவரை 48 டெஸ்ட் போட்டிகளிலும், 176 ஒரு நாள் போட்டிகளிலும் ஆடியிருக்கிறார்.