பிரீமியர் லீக் கால்பந்து: செல்சியா அணி அபார வெற்றி

பிரீமியர் லீக் கால்பந்து போட்டியில் எவர்டன் அணிக்கு எதிரான லீக் ஆட்டத்தில் செல்சியா அணி 5-0 என்ற கோல்கணக்கில் அபாரமாக வென்றது. இதன் மூலம் அந்த அணி புள்ளிப்பட்டியலில் முதலிடத்தைப் பிடித்தது.

பிரீமியர் லீக் கால்பந்து போட்டிகள் இங்கிலாந்தில் நடைபெற்று வருகின்றன. இதில் நேற்று முன்தினம் நள்ளிரவு நடந்த லீக் ஆட்டத்தில் எவர்ட்டன் அணியை எதிர்த்து செல்சியா ஆடியது. இப்போட்டியில் சிறப்பான ஆட்டத்தை வெளிப்படுத்திய செல்சியா அணி 5-0 என்ற கோல்கணக்கில் வெற்றியை ருசித்தது. செல்சியா அணியில் சிறப்பாக ஆடிய ஈடன் ஹசர்ட் 2 கோல்களை அடித்தார். இந்த வெற்றியின் மூலம் செல்சியா அணி புள்ளிகள் பட்டியலில் முதலிடத்தைப் பிடித்தது.

நேற்று முன்தினம் நடந்த மற்றொரு போட்டியில் சதர்லாண்ட் அணி 2-1 என்ற கோல்கணக்கில் போர்னிமவுத் அணியை வீழ்த்தி தங்களின் முதல் வெற்றியை பதிவு செய்தது. மான்செஸ்டர் சிட்டி அணிக்கும் மிடில்ஸ்பர்க் அணிக்கும் இடையே நடந்த மற்றொரு ஆட்டம் 1-1 என்ற கோல்கணக்கில் சமநிலையில் முடிந்தது.