டெஸ்ட் 1 - ஆஸி.யை அபாரமாக வீழ்த்தியது தென் ஆப்பிரிக்கா

ஆஸ்திரேலியாவுக்கு எதிரான முதல் டெஸ்ட் போட்டியில் தென் ஆப்பிரிக்க அணி 177 ரன்கள் வித்தியாசத்தில் அபார வெற்றி பெற்றது. 5 விக்கெட்கள் வீழ்த்திய காகிஸோ ரபாடா ஆட்ட நாயகனாக தேர்வானார்.

பெர்த்தில் நடைபெற்ற இந்த டெஸ்ட்டில் தென் ஆப்பிரிக்கா முதல் இன்னிங்ஸில் 242 ரன்களும், ஆஸ்திரேலியா 244 ரன்கள் எடுத்தன. 2 ரன்கள் பின்தங்கிய நிலையில் 2-வது இன்னிங்ஸை விளையாடிய தென் ஆப்பிரிக்கா 160.1 ஓவர்களில் 8 விக்கெட்கள் இழப்புக்கு 540 ரன்கள் குவித்து டிக்ளேர் செய்தது. டுமினி 141, டீன் எல்கர் 127, பிலாண்டர் 73, குயிண்டன் டி காக் 64 ரன்கள் எடுத்தனர்.

இதையடுத்து 539 ரன்கள் இலக்குடன் பேட் செய்த ஆஸ்திரேலிய அணி 4-வது நாள் ஆட்டத்தில் 55 ஓவர்களில் 4 விக்கெட்கள் இழப்புக்கு 169 ரன்கள் எடுத்தது. உஸ்மான் கவாஜா 58, ஷான் மார்ஷ் 15 ரன்களுடன் களத்தில் இருந்தனர்.

ஷான் மார்ஷ் 15, டேவிட் வார்னர் 35, ஸ்டீவ் ஸ்மித் 34, ஆடம் வோஜஸ் 1 ரன்களில் ஆட்டமிழந்தனர். தென் ஆப்பிரிக்கா தரப்பில் ரபாடா 3 விக்கெட்கள் வீழ்த்தியிருந்தார்.

கைவசம் 6 விக்கெட்களுடன் வெற்றிக்கு 370 ரன்கள் தேவை என்ற நிலையில் கடைசி நாள் ஆட்டத்தை ஆஸ்திரேலியா சந்தித்தது. 26 ரன்களில் மார்ஷை ரபாடா வெளியேற்றினார். கவாஜா-மார்ஷ் ஜோடி 5-வது விக்கெட்டுக்கு 50 ரன்கள் சேர்த்தது.

அடுத்த வந்த விக்கெட் கீப்பர் பீட்டர் நெவில் பொறுமையாக விளையாடினார். கவாஜாவுடன் இணைந்து அவர் 6-வது விக்கெட்டுக்கு 50 ரன்கள் சேர்த்தார். சதத்தை நெருங்கிய நிலையில் டுமினி பந்தில் எல்பிடபிள்யூ ஆனால் கவாஜா. 253 பந்துகளை சந்தித்த கவாஜா 11 பவுண்டரிகள், 3 சிக்ஸர்களுடன் 97 ரன்கள் சேர்த்தார்.

இதன் பின்னர் களமிறங்கிய மிட்செல் ஸ்டார்க் 13, பீட்டர் சிடில் 13, ஹஸல்வுட் 29, நாதன் லயன் 8 ரன்களில் நடையை கட்ட 119.1 ஓவர்களில் ஆஸ்திரேலிய அணி 361 ரன்களுக்கு அனைத்து விக்கெட்களையும் இழந்தது. பீட்டர் நெவில் 60 ரன்களுடன் கடைசி வரை ஆட்டமிழக்காமல் இருந்தார்.

தென் ஆப்பிரிக்கா தரப்பில் ரபாடா 5 விக்கெட்கள் வீழ்த்தினார். பிலாண்டர், டுமினி, கேசவ் மகராஜ், டெம்பா பவுமா ஆகியோர் தலா ஒரு விக்கெட் கைப்பற்றினர். 177 ரன்கள் வித்தியாசத்தில் வெற்றி பெற்ற தென் ஆப்பிரிக்க அணி 3 டெஸ்ட் போட்டிகள் கொண்ட தொடரில் 1-0 என முன்னிலை வகிக்கிறது. 2-வது டெஸ்ட் போட்டி வரும் 12-ம் தேதி ஹோபர்ட்டில் தொடங்குகிறது.

ஆஸ்திரேலிய அணி தொடர்ச்சியாக 4-வது தோல்வியை சந்தித்துள்ளது. இலங்கை சுற்றுப்பயணத்தில் 3 போட்டிகளிலும் தோல்வியடைந்து ஒயிட்வாஷ் பெற்ற நிலையில் தற்போது சொந்த மண்ணில் நடைபெற்று வரும் தொடரையும் தோல்வியுடன் தொடங்கி உள்ளது.

பெர்த் டெஸ்ட் போட்டி ஆஸ்திரேலிய அணிக்கு இந்த சீசனில் முதல் ஆட்டமாக அமைந்திருந்தது. 1988-க்கு பிறகு அந்த அணி சீசனின் முதல் போட்டியில் தற்போதுதான் தோல்வி கண்டுள்ளது. தென் ஆப்பிரிக்க அணியில் ஸ்டெயின் காயம் அடைந்த போதிலும் இளம் வீரரான ரபாடா தனது புயல் வேகத்தால் ஆஸ்திரேலிய அணியை சாய்த்துள்ளார்.

9 டெஸ்ட்டில் மட்டுமே விளையாடி உள்ள 21 வயதான ரபாடா 5 விக்கெட்களை கைப்பற்றுவது இது 5-வது முறையாகும். இதன் மூலம் தென் ஆப்பிரிக்க வீரர்களில் இளம் வயதில் இந்த சாதனையை படைத்த வீரர் என்ற பெருமையை ரபாடா பெற்றார்.