கனடா ஒபன் டென்னிஸ் தொடரில் 3-வது முறையாக ஹாலப் சாம்பியன்

டொராண்டோ: கனடா ஒபன் டென்னிஸ் தொடரில் ருமேனியாவின் சிமோனா ஹாலப் 3-வது முறையாக சாம்பியன் பட்டம் வென்றார்.

கனடாவின் டொராண்டோ நகரில் நடைபெற்று வந்த இந்தத் தொடரின் இறுதி ஆட்டத்தில் ருமேனியாவின் சிமோனா ஹாலப், பிரேசிலின் பீட்ரிஸ் ஹடாட் மியாவை எதிர்த்து விளையாடினார். இதில் முதல் செட்டை சிமோனா ஹாலப் 6-3 என கைப்பற்றினார். இதற்கு 2-வது செட்டில் பதிலடி கொடுத்த பீட்ரிஸ் ஹடாட் மியா அந்த செட்டை 6-2 என தன்வசப்படுத்தினார். இதனால் வெற்றியை தீர்மானித்த 3-வது செட் ஆட்டம் பரபரப்பானது.

இந்த செட்டை 6-3 என சிமோனா ஹாலப் வென்றார். முடிவில் 2 மணி நேரம் 16 நிமிடங்கள் நடைபெற்ற இந்த ஆட்டத்தில் சிமோனா ஹாலப் 6-3,2-6, 6-3 என்ற செட் கணக்கில் வெற்றி பெற்று கோப்பையை வென்றார். கனடா ஓபனில் சிமோனா ஹாலப் பட்டம் வெல்வது இது 3-வது முறையாகும். 2016 மற்றும் 2018-ம் ஆண்டுகளிலும் சிமோனா ஹாலப் கோப்பையை வென்றிருந்தார்.

ஒட்டுமொத்தமாக சர்வதேச மகளிர் டென்னிஸ் தொடரில் சிமோனா ஹாலப் வென்றுள்ள 24-வது கோப்பை இதுவாகும். இந்த வெற்றியின் மூலம் சர்வதேச டென்னிஸ் தரவரிசையில் 9 இடங்கள் முன்னேறி 6-வது இடத்தை பிடித்துள்ளார் சிமோனா ஹாலப். வெற்றி குறித்து சிமோனா ஹாலப் கூறும்போது, “இந்த வெற்றியின் மூலம் சர்வதேச டென்னிஸ் தரவரிசையில் மீண்டும் 10 இடங்களுக்குள் வந்துள்ளேன். இந்த போட்டியில் வெளிப்படுத்திய செயல்திறன் மகிழ்ச்சி அளிக்கிறது’’ என்றார்.