1962 உலகக் கோப்பை பிரேசில் மீண்டும் சாம்பியன்

1962-ம் ஆண்டு 7-வது உலகக் கோப்பை கால்பந்து போட்டி தென்அமெரிக்க நாடான சிலியில் நடைபெற்றது. இந்த உலகக் கோப்பையில் நாடுகளுக்கு இடையே நடைபெற்ற கால்பந்து ஆட்டங்களைவிட போட்டியை நடத்த 3 நாடுகளிடையே போட்டி கடுமையாக இருந்தது.

போட்டியை எந்த நாடு நடத்துவது என்பதை முடிவு செய்ய 1960-ம் ஆண்டில் ஃபிபா கூட்டம் நடைபெற்றது. மேற்கு ஜெர்மனி, ஆர்ஜெண்டீனா, சிலி ஆகிய நாடுகள் போட்டியை நடத்த விண்ணப்பித்திருந்தன.

சிலியின் போராட்டம்

தொடர்ந்து இருமுறை ஐரோப்பிய நாடுகளில் கால்பந்து போட்டி நடைபெற்று விட்டதால் மேற்கு ஜெர்மனி நிராகரிக் கப்பட்டது. அடுத்ததாக ஆர்ஜெண்டீனா, சிலி ஆகிய நாடுகள் இடையே உலகக் கோப்பையை நடத்த கடும் போட்டி நிலவியது. கால்பந்து பராம்பரியம் மிக்க நாடு, கால்பந்துக்கு அதிக ரசிகர்கள் உள்ள நாடு என்ற அடிப்படையில் ஆர்ஜெண்டீனாவுக்கு போட்டி நடத்த வாய்ப்பு வழங்க அதிக காரணங்கள் இருந்தன.

அதே நேரத்தில் 1960-ம் ஆண்டு சிலியில் ஏற்பட்ட கடுமையான நிலநடுக்கத் தில் 5 ஆயிரம் பேர் வரை உயிரிழந் தனர். இந்த சம்பவம் அந்நாட்டுக்கு போட்டியை கொண்டு செல்வதில் பெரும் சிக்கலை ஏற்படுத்தியது.

எனினும் நிலநடுக்க சோகத்தை மைய மாக வைத்து சிலி கால்பந்து கூட்டமைப் பின் தலைவர் கார்லோஸ் டிர்பார்ன் வாதாடினார். நிலநடுக்கத்தால் இப்போது நாங்கள் அனைத் தையும் இழந்துள்ளோம். குறைந்தபட்சம் உலகக் கோப்பை போட் டியை எங்கள் நாட்டில் நடத்த உதவக் கூடாதா என்று ஃபிபாவிடம் கார்லோஸ் முறையிட்டு வெற்றி பெற்றார்.

பீலே வெளியேறினார்

கடந்த ஆண்டுகளைப் போலவே இந்த உலகக் கோப்பையிலும் 16 அணிகள் பங்கேற்றன. இந்த உலகக் கோப்பை போட்டியில் நடப்பு சாம்பியனான பிரேசில் அணியின் ஆதிக்கமே தொடர்ந்தது. 2-வது ஆட்டத்திலேயே நட்சத்திர வீரர் பீலே காயமடைந்து வெளியேறியது ரசிகர்களுக்கு பெரும் அதிர்ச்சியை ஏற்படுத்தியது. அக்காலகட்டத்தில் புகழின் உச்சியில் இருந்த பீலே, மெக்ஸிகோ அணிக்கு எதிரான முதல் ஆட்டத்தில் ஒரு கோல் அடித்தார். அதில் 2-0 என்ற கணக்கில் பிரேசில் வென்றது.

செக்கோஸ்லோவேகியாவுக்கு எதிரான ஆட்டத்தில் வெகுதூரத்தில் பந்தை கோலடிக்க முயற்சித்தபோது பீலே காயமடைந்து வெளியேறினார். அதன் பிறகு இந்த உலகக் கோப்பையில் எந்த போட்டியிலும் அவர் விளையாடவில்லை. அவருக்கு பதிலாக மாற்று ஆட்டக்காரர் அமாரில்டோ களமிறங்கினார். இந்த உலகக் கோப்பையில் தோல்வியே அடையாத அணியாக பிரேசில் இருந்தது.

வீரர்களின் மோசமான மோதல்

உலகக் கோப்பை கால்பந்தில் வீரர்கள் மிகமோசமாக விளையாடியது இத்தாலி, சிலி அணிகளுக்கு இடையிலான போட்டி யின்போது அரங்கேறியது. சுமார் 70 ஆயிரம் ரசிகர்களின் பெரும் ஆரவாரத் துக்கு நடுவே சிலி இத்தாலி அணிகளுக்கு இடையிலான ஆட்டம் தொடங்கியது. எதிரணியினரை தள்ளி விடுவது, உதைப்பது போன்ற மோசமான செயல்களில் இரு தரப்பினரும் ஈடு பட்டனர்.

இத்தாலி வீரர்கள் இருவர் சிவப்பு அட்டை காண்பிக்கப்பட்டு வெளியேற்றப் பட்டனர். போட்டி முடிந்த பிறகு இரு அணியினரையும் போலீஸார் பாதுகாப்பாக அழைத்துச் செல்ல வேண்டிய நிலை உருவானது. இந்த ஆட்டத்தில் சிலி 2-0 என்ற கணக்கில் வென்றது.

கரிஞ்சா, வாவா

பிரேசில் அணியில் பீலே இல்லாத குறையை கரிஞ்சா, வாவா ஆகியோர் நீக்கினார். பிரேசில், சிலி, செக்கோஸ் லோவேகியா, யுகோஸ்லோவேகியா ஆகிய அணிகள் அரையிறுதிக்கு முன்னேறின. பிரேசில், செக்கோஸ்லோ வேகியா ஆகிய அணிகள் இறுதி ஆட்டத்துக்கு முன்னேறின. பரபரப்பான இறுதி ஆட்டத்தில் 15-வது நிமிடத்திலேயே கோல் அடித்து செக்கோஸ்லோவேகியா முன்னிலை பெற்றது.

ஆனால் 17-வது நிமிடத்திலேயே பிரேசில் கோல் கணக்கை சமன் செய்தது. இதன் பிறகு போட்டி கடுமையானது. இரு அணிகளுமே கோல் அடிக்க கடுமையாக போராடின. 68 மற்றும் 77-வது நிமிடங்களில் பிரேசில் கோல் அடித்து 3-1 என்ற கணக்கில் வென்று சாம்பியன் பட்டத்தை தக்கவைத்துக் கொண்டது. போட்டியை நடத்திய சிலி 3-வது இடம் பிடித்தது.

அசத்திய ‘சிறிய பறவை’

சிறிய பறவை என்ற அர்த்தத்தில் கரிஞ்சா என்று ரசிகர்களால் அழைக்கப்பட்டவர் பிரேசில் முன்கள வீரர் மானுவேல் பிரான் சிஸ்கோ. இந்த உலகக் கோப்பையில் பிரேசில் அணி வெல்ல முக்கிய காரண மாக இருந்தவர் கரிஞ்சா. அவர் அடித்த 4 கோல்களுமே மிகவும் முக்கியமானவை. இப்போட்டியில் அதிக கோல் அடித்தவர்களில் இவரும் ஒருவர். பீலே இல்லாமல் பிரேசில் உலகக் கோப்பையை வெல்ல கரிஞ்சாவின் சிறப்பான ஆட்டம் முக்கியக் காரணமாக இருந்தது.

உங்களுக்கு தெரியுமா?

உலகக் கோப்பை போட்டிகளில் அதிக கோல் அடித்த வீரர் பிரேசிலின் ரொனால்டா. 1998 (4 கோல்), 2002 (8 கோல்), 2006 (3 கோல்) என மூன்று உலகக் கோப்பை போட்டிகளில் பங்கேற்று மொத்தம் 15 கோல்களை அடித்துள்ளார்.

இந்த பட்டியலில் இரண்டாவது இடத்தில் இருப்பவர் ஜெர்மனியின் மிரோஸ்லாவ் க்ளோஸ். இவர் 2002 (5 கோல்), 2006 (5 கோல்), 2010 (4 கோல்) என மொத்தம் 14 கோல்கள் அடித்துள்ளார். இப்போது நடைபெறவுள்ள உலகக் கோப்பையிலும் க்ளோஸ் களமிறங்குகிறார். எனவே ரொனால்டோவிடம் இருந்து அவர் முதலிடத்தை பறிக்க வாய்ப்பு அதிகம் உள்ளது.

1962 உலகக் கோப்பை புள்ளி விவரங்கள்

மொத்த ஆட்டங்கள்- 35

மொத்த கோல்கள் - 89

ஒரு போட்டிக்கு சராசரி கோல் - 2.78

மைதானத்திற்கு வந்தவர்களின் மொத்த எண்ணிக்கை - 7,76,000

டாப் ஸ்கோர்

4 கோல்கள்

கரிஞ்சா (பிரேசில்)

இவானோவ் (சோவியத் யூனியன்)

லயோனல் (சிலி)

வாவா (பிரேசில்)

ஆல்பர்ட் (ஹங்கேரி)

ஜெர்கோவிச் (யுகோஸ்லேவேகியா)