இலங்கை வாரிய அணி 121 ஆல் அவுட்; கோலி, ரோஹித் சர்மா மீண்டும் ஏமாற்றம்

கொழும்புவில் நடைபெறும் பயிற்சி ஆட்டத்தில் இலங்கை வாரியத் தலைவர் அணியை 121 ரன்களுக்குச் சுருட்டி இந்திய அணி 230 ரன்கள் முன்னிலை பெற்றது. இசாந்த் சர்மா 7 ஓவர்கள் 1 மெய்டன் 23 ரன்கள் 5 விக்கெட்டுகள் என்று அபாரமாக பந்துவீசினார்.

இதனையடுத்து தொடர்ந்து 2-வது இன்னிங்சை ஆடிவரும் இந்திய அணியில், தொடக்க வீரர்களாக ’தங்கள் பார்முக்காக சற்றும் மனம் தளராது போராடி வரும்’ விராட் கோலி, ரோஹித் சர்மா களமிறங்கி ஏமாற்றமளித்தனர்..

20 பந்துகளைச் சந்தித்த ரோஹித் சர்மா 1 பவுண்டரியுடன் 8 ரன்கள் எடுத்திருந்த போது இடது கை வேகப்பந்து வீச்சாளர் விஸ்வ திலினா பெர்ணாண்டோவிடம் எல்.பி.ஆகி வெளியேறினார். முதல் இன்னிங்ஸிலும் 7 ரன்களில் ரோஹித் ஏமாற்றமளித்தது குறிப்பிடத்தக்கது.

இவருக்கு அடுத்தபடியாக விராட் கோலி 34 பந்துகளைச் சந்தித்து 1 பவுண்டரியுடன் 18 ரன்கள் எடுத்த நிலையில் முதல் இன்னிங்ஸில் அவுட் ஆன அதே ரஜிதாவிடம் ஆட்டமிழந்தார். பதிரானா என்பவரிடம் கேட்ச் கொடுத்து 2-வது இன்னிங்ஸிலும் ஏமாற்றமளித்தார் விராட் கோலி.

இடையில் விருத்திமான் சஹா 1 ரன்னில் பெர்ணாண்டோவின் பந்தில் எல்.பி.ஆனார். 28/3 என்று சொதப்பி வரும் நிலையில் புஜாரா, கே.எல்.ராகுல் ஆகியோர் களத்தில் உள்ளனர்.

முன்னதாக இந்திய அணி தன் முதல் இன்னிங்ஸில் 351 ரன்கள் எடுக்க தொடர்ந்து ஆடிய இலங்கை வாரியத் தலைவர் அணி தொடக்கத்தில் இசாந்த் சர்மா வேகத்துக்கு 10 ரன்களுக்கே 5 விக்கெட்டுகளை இழந்தது.

ஆனால் அதன் பிறகு சிரிவர்தனா (32), டிக்வெல்லா (41), குணதிலக (28) ஆகியோர் பங்களிப்பு செய்ய 121 ரன்கள் எடுத்தது. இசாந்த் தவிர இந்திய தரப்பில் வருண் ஆரோன், அஸ்வின் ஆகியோர் தலா 2 விக்கெட்டுகளைக் கைப்பற்ற ஹர்பஜன் சிங் 1 விக்கெட்டை கைப்பற்றினார்.