ஸ்டீவ் ஸ்மித்தை பின்னுக்குத் தள்ளி நம்பர் 1 இடத்தைப் பிடித்தார் ஜோ ரூட்

ஆஷஸ் தொடரை இங்கிலாந்து வெல்வதில் முக்கிய பங்கு வகித்த இங்கிலாந்து பேட்ஸ்மென் ஜோ ரூட் ஐசிசி டெஸ்ட் தரவரிசையில் ஸ்டீவ் ஸ்மித்தை கீழிறக்கி நம்பர் 1 இடத்தைப் பிடித்துள்ளார்.

ஸ்மித் 3-ம் இடத்துக்குச் செல்ல ஜோ ரூட் முதலிடம் பிடித்தார், ஏ.பி.டிவில்லியர்ஸ் 2-ம் இடத்தில் உள்ளார்.

டிரெண்ட் பிரிட்ஜ் டெஸ்ட் போட்டியில் ஸ்டீவ் ஸ்மித்தை இங்கிலாந்து நிறுத்தி வைத்து வீழ்த்தினர், ஒரு பவுண்டரியை ஆஃப் திசையில் அடித்த பிறகு பீல்டர் ஒருவரை அதே திசையில் சுமார் 25-30 அடி வலப்புறமாக நகர்த்தியதைக் கவனியாமல் தேநீர் இடைவேளைக்கு 2 பந்துகளே இருக்கும் போது மீண்டும் அதே பந்துக்கு அதே ஷாட்டை ஆடி கேட்ச் கொடுத்து ஸ்மித் ஆட்டமிழந்தது ஷேன் வார்ன், மற்றும் ரிக்கி பாண்டிங்கின் கடுமையான விமர்சனத்தை ஈர்த்துள்ளன.

அதே போல் பந்துவீச்சு தரவரிசையில் ஸ்டூவர்ட் பிராட் 5-ம் இடத்திலிருந்து 2-ம் இடத்துக்கு முன்னேறியுள்ளார்.

ஜோ ரூட் 4 டெஸ்ட் போட்டிகளில் 443 ரன்களை 73.83 என்ற சராசரியில் எடுத்து அசத்தி வருகிறார். முதல் டெஸ்ட் போட்டியில் ஒரு சதம் மற்றும் அரைசதம், டிரெண்ட் பிரிட்ஜில் இந்தத் தொடரின் 2-வது சதத்தை எடுத்தார் ஜோ ரூட். அதுவும் பிராட் ஆஸ்திரேலியாவை 60 ரன்களுக்குச் சுருட்டி துவம்சம் செய்த பிறகு முக்கிய கட்டத்தில் இவரும் பேர்ஸ்டோவும் அருமையான பார்ட்னர்ஷிப்பில் இங்கிலாந்தை வலுவான நிலைக்கு இட்டுச் சென்றனர்.

ஐசிசி டெஸ்ட் பேட்டிங் தரவரிசை:

ஜோ ரூட், ஏபி.டிவில்லியர்ஸ், ஸ்டீவ் ஸ்மித், ஹஷிம் ஆம்லா, குமார் சங்கக்காரா, அஞ்சேலோ மேத்யூஸ், யூனிஸ் கான், கேன் வில்லியம்சன், கிறிஸ் ராஜர்ஸ், விராட் கோலி.

ஐசிசி டெஸ்ட் பவுலிங் தரவரிசை:

டேல் ஸ்டெய்ன், ஸ்டூவர்ட் பிராட், ஜேம்ஸ் ஆண்டர்சன், டிரெண்ட் போல்ட், யாசிர் ஷா, வெர்னன் பிலாண்டர், மிட்செல் ஜான்சன், ரங்கனா ஹெராத், டிம் சவுதீ, மோர்னி மோர்கெல்.