மெஸ்ஸி குடும்பத்தினர் மீது சிலி ரசிகர்கள் தாக்குதல்

கோப்பா அமெரிக்கா கால்பந்து தொடர் இறுதிப் போட்டியில் அர்ஜெண்டினா நட்சத்திரம் லயோனல் மெஸ்ஸி குடும்பத்தினர் மீது வசைபொழிந்து, தாக்கியுள்ளனர் சிலி நாட்டு ரசிகர்கள்.

இறுதிப் போட்டியில் அர்ஜெண்டினா அணி பெனால்ட்டி ஷூட் அவுட்டில் தோல்வி தழுவி கோப்பை கனவு தகர்ந்தது. சிலி வரலாறு படைத்தது. ஆனால் ஆட்டம் முழுதும் மெஸ்ஸியை கடுமையாக, பல முறை விதிமுறைகளை மீறி, சிலி தடுப்பாட்ட வீரர்கள் எதிர்கொண்டனர்.

ஒரு முறை சிலியின் கேரி மீடல், மெஸ்ஸியின் நெஞ்சைக் குறிவைத்து ஒரு உதைவிட்டதும் நடந்தது.

இந்நிலையில் இந்த இறு'தீ' போட்டியின் முதல் பாதி ஆட்டத்தில் ஸ்டேடியத்தில் அமர்ந்திருந்த மெஸ்ஸி குடும்பத்தினரை சிலி ரசிகர்கள் கேலி செய்ததோடு, தாக்கவும் செய்தனர்.

மெஸ்ஸியின் சகோதரர் ரோட்ரிகோவை ரசிகர் ஒருவர், கடும் வாக்குவாதங்களுக்குப் பிறகு தாக்கினார். அதன் பிறகு பாதுகாப்பு கருதி மெஸ்ஸியின் குடும்பத்தினர் தொலைகாட்சி கேபினுக்கு மாற்றப்பட்டனர்.

அதேபோல் அர்ஜெண்டின ஸ்ட்ரைக்கர் செர்ஜியோ அகுயெரோ குடும்பத்தினர் மீதும் சிலி ரசிகர்கள் தாக்குதல் நடத்தினர்.