ஒலிம்பிக் ரக்பி தகுதிச் சுற்று சென்னையில் நடக்கிறது

பிரேசிலின் ரியோ டி ஜெனிரோவில் அடுத்த ஆண்டு ஒலிம்பிக் போட்டி நடைபெறுகிறது. இதில் இடம்பெற்றுள்ள ரக்பி விளையாட்டுக்கான ஆசிய அளவிலான தகுதிச்சுற்றுக்கு முந்தைய சுற்று “ஆசிய ரக்பி 7” என்ற பெயரில் சென்னையில் உள்ள நேரு மைதானத்தில் வரும் 7, 8 ஆகிய தேதிகளில் நடக்கிறது.

தமிழ்நாடு விளையாட்டு மேம்பாட்டு ஆணையத்தின் ஆதரவுடன் தமிழ்நாடு ரக்பி யூனியன் சார்பில் நடைபெறும் இந்தப் போட்டி, இந்தியாவில் நடைபெறும் மிகப்பெரிய ரக்பி போட்டியாகும்.

ஆடவர், மகளிர் என இரு பிரிவுகளிலும் நடைபெறும் இந்தப் போட்டியில் இந்தியா, குயாம், ஈரான், பிலிப்பைன்ஸ், தென் கொரியா, உஸ்பெகிஸ்தான், லாவோஸ், ஐக்கிய அரபு எமிரேட்ஸ், சவுதி அரேபியா, வங்கதேசம், நேபாளம், புருனேய் ஆகிய 12 நாடுகள் கலந்துகொள்கின்றன. காலை 10 மணி முதல் இரவு 8 மணி வரை போட்டிகள் நடைபெறவுள்ளன.