சிட்னி டெஸ்ட் போட்டிக்கு மிட்செல் ஜான்சன் சந்தேகம்

ஜனவரி 6-ஆம் தேதி சிட்னியில் தொடங்கும் இந்திய-ஆஸ்திரேலிய அணிகளின் கடைசி டெஸ்ட் போட்டியில் மிட்செல் ஜான்சன் விளையாடுவது சந்தேகமாகியுள்ளது.

பின் தொடை தசை நார் பிரச்சினை காரணமாக அவர் சிட்னி டெஸ்ட் போட்டியில் விளையாடுவது சந்தேகமாகியுள்ளது. அவர் சனிக்கிழகை ஆஸ்திரேலிய அணியினர் சிட்னியில் பயிற்சி மேற்கொண்ட போது பங்கேற்கவில்லை.

எனினும், போட்டி தொடங்கும் முன்னர் அவரது உடல் தகுதி கடைசியாக ஒருமுறை பரிசோதனை செய்யப்பட்டு முடிவெடுக்கப்படும் என்று தெரிகிறது.

அடிலெய்ட், மெல்போர்ன் போன்ற மட்டையாளர்களுக்கு சாதகமான ஆட்டக்களத்தில் மிட்செல் ஜான்சனின் பணிச்சுமை அதிகரித்துள்ளது. அவரே குறைந்த ஓவர்கள் கொண்ட ஸ்பெல்களில் தன்னைப் பயன்படுத்த வேண்டும் என்று பயிற்சியாளர் டேரன் லீ மேன் மற்றும் கேப்டன் ஸ்மித்திடம் பேசவிருப்பதாக தெரிவித்திருந்தார்.

இந்நிலையில் ஜான்சன் விளையாட முடியாது போனால் பீட்டர் சிடில் அல்லது மிட்செல் ஸ்டார்க் அணியில் இடம்பெறலாம் என்று எதிர்பார்க்கப்படுகிறது.

சிட்னி ஆட்டக்களம் வேகப்பந்து வீச்சுக்கு சாதகமாகி நீண்ட நாட்களாகி விட்டது என்பது குறிப்பிடத்தக்கது.