சனத் ஜெயசூர்யா தலைமையிலான இலங்கை கிரிக்கெட் தேர்வுக்குழு ஒட்டுமொத்தமாக ராஜினாமா

இந்திய அணிக்கு எதிராக டெஸ்ட் தொடர் ஒயிட் வாஷ், அடுத்து ஒருநாள் தொடரிலும் தொடர் தோல்வி எதிரொலியால் ரசிகர்கள் மைதானத்தில் ரகளையில் ஈடுபட்டதையடுத்து சனத் ஜெயசூரியா தலைமையிலான இலங்கை கிரிக்கெட் அணி தேர்வுக்குழு உறுப்பினர்கள் 5 பேர் மொத்தமாக ராஜினாமா செய்துள்ளனர்.

விளையாட்டுத்துறை அமைச்சர் தயாசிறி ஜெயசேகராவுக்கு இவர்கள் கூட்டாக ராஜினாமா கடிதம் அனுப்பினர்.

இலங்கையின் தொடர் தோல்விகளுக்கு அணித்தேர்வுக்குழுவும் ஒரு காரணம் என்று கடும் விமர்சனங்கள் எழுந்தன, முன்னாள் கேப்டன் அர்ஜுனா ரணதுங்கா, ‘முதுகெலும்பில்லாத தேர்வுக்குழு’ என்று சாடியதோடு இலங்கை கிரிக்கெட்டைப் பார்க்கவே பிடிக்கவில்லை என்று சாடியதும் நினைவுகூரத்தக்கது.

ஜிம்பாப்வே அணிக்கு எதிராக ஒருநாள் தொடரை இழந்து உலகக்கோப்பையில் நேரடி தகுதி வாய்ப்பை சிக்கலுக்குள்ளாக்கிக் கொண்டுள்ள இலங்கை அணி இந்தியாவுக்கு எதிரான இந்தத் தொடரில் 2 போட்டிகளில் வென்றால் நேரடியாகத் தகுதி பெறும் வாய்ப்பைப் பெற்றிருந்தது, ஆனால் அதுவும் தற்போது சிக்கலுக்குள்ளானதில் ரசிகர்கள் உட்பட அனைவரும் கடும் ஆத்திரமடைந்தனர், இதன் விளைவுதான் அன்று மைதானத்தில் பாட்டில்கள் பறந்தன.

இந்நிலையில் சனத் ஜெயசூரியா தலைமையிலான தேர்வுக்குழு ஒட்டுமொத்தமாக ராஜினாமா செய்துள்ளது.