பிஎன்பி பரிபாஸ் ஓபன் டென்னிஸ்: 3-வது சுற்றில் ஜோகோவிச்

பிஎன்பி பரிபாஸ் ஓபன் தொடரில் ஜோகோவிச், ரோஜர் பெடரர், ரபேல் நடால் ஆகியோர் 3-வது சுற்றுக்கு முன்னேறினர்.

அமெரிக்காவின் கலிபோர்னி யாவில் உள்ள இந்தியன் வெல்ஸ் நகரில் நடைபெற்று வரும் இந்த தொடரில் ஆடவருக்கான ஒற்றையர் பிரிவில் 2-ம் நிலை வீரரான செர்பியாவின் ஜோகோவிச் 6-4, 7-6 (7-5) என்ற நேர் செட்டில் 46-ம் நிலை வீரரான இங்கிலாந்தின் கைல் எட்மண்டை வீழ்த்தினார்.

5-ம் நிலை வீரரான ஸ்பெயின் ரபேல் நடால் 6-3, 6-2 என்ற நேர் செட்டில் 145-ம் நிலை வீரரான அர்ஜென்டினாவின் கைடோ பெல்லாவைத் தோற்கடித்தார். 9-ம் நிலை வீரரான சுவிட்சர்லாந்தின் ரோஜர் பெடரர் 6-2, 6-1 என்ற நேர் செட்டில் 871-ம் நிலை வீரரான பிரான்சின் ஸ்டீபன் ராபர்ட்டை வீழ்த்தினார்.

இதேபோல் 4-ம் நிலை வீரரான ஜப்பானின் நிஷிகோரி 6-3, 6-4 என்ற செட் கணக்கில் இங்கிலாந் தின் டேனியல் இவான்ஸைத் தோற்கடித்தார். 6-ம் நிலை வீரரான குரோஷியாவின் மரின் சிலிச் 6-4, 5-7, 4-6 என்ற செட் கணக்கில் 19 வயதான 136-ம் நிலை வீரரான அமெரிக்காவின் டெய்லார் பிரிட் ஸிடம் அதிர்ச்சி தோல்வியடைந்தார்.

முகுருசா வெற்றி

மகளிர் ஒற்றையர் பிரிவில் நடைபெற்ற 3-வது சுற்று ஆட்டத்தில் ஸ்பெயினின் கார்பைன் முகுருசா 6-2, 6-1 என்ற நேர் செட்டில் அமெரிக்காவின் கைலா டேவை வீழ்த்தினார். மற்ற ஆட்டங்களில் ரஷ்யாவின் குஷ்நட்சோவா, பிரான்சின் கரோலின் கார்சியா, சுலோவேக்கியாவின் டோமினிகா ஷிபுல் கோவா, செக் குடியரசின் கரோலினா பிளிஸ்கோவா, உக்ரைனின் எலினா சுவிட்டோலினா ஆகியோர் வெற்றி பெற்றனர்.