சாம்பியன்ஸ் ட்ராபியில் அனைத்துப் பிரிவுகளிலும் சிறந்து விளங்கும் அணியாக இந்தியா நுழைகிறது: கோலி

சாம்பியன்ஸ் ட்ராபியில் அனைத்துப் பிரிவுகளிலும் சிறந்து விளங்கும் அணியாக இந்திய அணி நுழைகிறது என்று இந்திய அணியின் கேப்டன் விராட் கோலி கூறியுள்ளார்.

வங்கதேச அணியுடனான செவ்வாய்க்கிழமை நடந்த பயிற்சி ஆட்டத்தில், முதலில் களமிறங்கிய இந்திய அணி 50 ஓவர்களில் 7 விக்கெட்கள் இழப்புக்கு 324 ரன்கள் குவித்தது. இதனையடுத்து களமிறங்கிய வங்கதேச அணி 23.5 ஓவர்களில் 84 ரன்களுக்கு சுருண்டது. இதன்மூலம் 240 ரன்கள் வித்தியாசத்தில் இந்திய அணி மிகப்பெரிய வெற்றியை பதிவு செய்தது.

வங்கதேச அணியுடனான போட்டி குறித்து இந்திய அணி கேப்டன் விராட் கோலி கூறும்போது, "நாங்கள் இரண்டு பயிற்சி ஆட்டங்களிலும் சிறப்பாக செயல்பட்டிருக்கிறோம். நியூசிலாந்துக்கு எதிரான போட்டியில் பவுலர்கள் சிறப்பாக பந்து வீசினார்கள். வங்கேதேச அணியுடனான பயிற்சி ஆட்டத்தில் பேட்ஸ்மேன்கள் சிறப்பாக செயல்பட்டனர். வங்கதேச அணியுடனான நேற்றைய பயிற்சி ஆட்டத்தில் தினேஷ் கார்த்திக், ஹர்திக் பாண்டியா சிறப்பாக செயல்பட்டனர். ஃபில்டிங்கிலும் வீரர்கள் சிறப்பாக செயல்பட்டனர். இவ்வாறு அனைத்துப் பிரிவுகளிலும் சிறந்து விளங்கும் இந்திய அணி சாம்பியன்ஸ் டிராபியில் நுழைகிறது"

வங்க தேச அணியுடனான தினேஷ் கார்த்திக்கின் ஆட்டம் குறித்து கோலி, "தினேஷ் கார்த்திக் ஒரு சிறந்த வீரர். அவர் தொடர்ந்து ரன் குவிக்க விரும்புகிறோம்" என்றார்.

வங்கதேச அணியுடனான நேற்றைய பயிற்சி ஆட்டத்தில் தினேஷ் கார்த்திக் 77 பந்துகளில், ஒரு சிக்ஸர், 8 பவுண்டரிகளுடன் 94 ரன்கள் குவித்தார் என்பது குறிப்பிடத்தக்கது.