டேவிஸ் கோப்பையை வென்றது சுவிட்சர்லாந்து

டேவிஸ் கோப்பை டென்னிஸ் போட்டியில் சுவிட்சர்லாந்து அணி சாம்பியன் ஆனது.

பிரான்ஸ்-சுவிட்சர்லாந்து இடையிலான டேவிஸ் கோப்பை இறுதிப் போட்டி பிரான்ஸின் லில்லி நகரில் நடைபெற்றது. நேற்று நடந்த ஒற்றையர் ஆட்டத்தில் சுவிட்சர்லாந்தின் ஃபெடரர் 6-4, 6-2, 6-2 என்ற நேர் செட்களில் பிரான்ஸை சேர்ந்த ரிச்சர்ட் காஸ்கட்டை தோற்கடித்தார். இதன்மூலம் கடைசி ஆட்டம் ஆடுவதற்கு முன்பே சுவிட்சர்லாந்து 3-1 என்ற கணக்கில் பிரான்ஸை வீழ்த்தி டேவிஸ் கோப்பையை முதல்முறையாக வென்றது.

2-வது நாள் நடந்த இரட்டையர் ஆட்டத்தில் ஃபெடரர் வாவ்ரிங்கா ஜோடி வெற்றி பெற்றதால் சுவிட்சர்லாந்து 2-1 என முன்னிலை பெற்றிருந்தது குறிப்பிடத்தக்கது.

17 கிராண்ட்ஸ்லாம் பட்டங்களும், ஒலிம்பிக்கில் தங்கப் பதக்கமும் வென்றிருந்த ரோஜர் ஃபெடரரின் டென்னிஸ் வாழ்க்கையில் டேவிஸ் கோப்பையை வெல்லவில்லை என்ற குறை மட்டுமே இருந்தது. இப்போது அந்த குறையும் தீர்ந்துள்ளது.