ஸ்மித், வில்லியம்சன், ஜோ ரூட் ஆகியோரை விட கோலியே சிறந்த பேட்ஸ்மென்: பிளிண்டாஃப் கருத்து

தற்போதைய சிறந்த பேட்ஸ்மென்களான ஸ்மித், வில்லியம்சன், ஜோ ரூட், கோலி ஆகியோரில் விராட் கோலி ‘வேறு ஒரு உலகத்தில்’ இருக்கும் வீரர் என்று இங்கிலாந்தின் முன்னாள் வேகப்பந்து வீச்சாளர் ஆண்ட்ரூ பிளிண்டாஃப் தெரிவித்துள்ளார்.

“இவர்கள் அனைவருமே நல்ல பேட்ஸ்மென்கள்தான், ஆனால் விராட் இவர்களுக்கு மேல் நிலையில் உள்ளார்.

கோலி ஆடுவதைப் பாருங்கள், அவரிடம் உள்ள ஈர்க்கக்கூடிய ஒரு விஷயம் டெஸ்ட் போட்டிகளில் அனைத்து ஷாட்களும் அவர் கைவசம் உள்ளது. ஆனால் அவர் நிதானமாக ஆடி ரன்களைச் சேகரிக்கிறார்.

பிறகு, குறைந்த ஓவர்கள் போட்டியென்றால் விராட் கோலி, எந்த வித ரிஸ்கும் எடுக்காமல் அனாயசமாக பவுண்டரிகளை அடிக்கிறார். அவர் முழு கட்டுப்பாட்டில் இருக்கிறார்.

மற்ற மூன்று வீரர்களும் சிறந்த வீரர்கள்தான் ஆனால் கோலி வேறு ஒரு உலகத்தில் இருக்கிறார்” என்றார் பிளிண்டாஃப்.

ஐசிசி பேட்டிங் தரவரிசையில் ஸ்மித், வில்லியம்சன், ரூட் ஆகியோருக்கு அடுத்த இடத்தில் 4-வதாக கோலி உள்ளார் என்பது குறிப்பிடத்தக்கது.