நேதன் லயன் 8 விக்கெட்டுகள் வீழ்த்தி சாதனை; இந்திய அணி 189 ரன்களுக்குச் சுருண்டது

புனே தோல்விக்குப் பிறகான அனைத்து இந்திய பில்ட்-அப்புக்கும் முற்றுப்புள்ளி வைக்கும் விதமாக நேதன் லயன் 50 ரன்களுக்கு 8 விக்கெட்டுகளை வீழ்த்த இந்திய அணி முதல் நாளிலேயே 189 ரன்களுக்குச் சுருண்டது.

இந்தியாவில் வந்து வீசும் அயல்நாட்டு பவுலர் ஒருவர் எடுக்கும் அதிக விக்கெட்டுகளுக்கான சாதனையை நிகழ்த்தினார் நேதன் லயன். 22.4 ஓவர்கள் வீசிய நேதன் லயன் அதில் 4 மெய்டன்களுடன் 50 ரன்களுக்கு 8 விக்கெட்டுகளைக் கைப்பற்றினார். இதற்கு முன்னர் லான்ஸ் குளூஸ்னர் 8 விக்கெட்டுகளை வீழ்த்தியுள்ளார் ஆனால் அவர் 64 ரன்களை விட்டுக் கொடுத்தார், அந்த வகையில் நேதன் லயன் தற்போது குறைந்த ரன்களில் 8 விக்கெட்டுகளை இந்தியாவில் கைப்பற்றி சாதனை புரிந்துள்ளார். மீதி 2 விக்கெட்டுகளில் கருண் நாயர் விக்கெட்டை ஓகீஃபும், முகுந்த் விக்கெட்டை ஸ்டார்க்கும் வீழ்த்தினர்.

உணவு இடைவேளையின் போது 77/2 என்று இருந்த இந்திய அணி தேநீர் இடைவேளையின் போது 168/5 என்று இருந்தது, தேநீர் இடைவேளைக்குப் பிறகு 189 ரன்களுக்குச் சுருண்டது. இந்திய அணியில் கே.எல்.ராகுல் உண்மையில் சிறப்பாக ஆடி 205 பந்துகள் தாக்குப்பிடித்து 9 பவுண்டரிகளுடன் 90 ரன்கள் எடுத்து கடைசியில் 9-வது விக்கெட்டாக லயன் பந்தில் ரென்ஷாவிடம் கேட்ச் கொடுத்து அவுட் ஆனார்.

நேதன் லயன் அருமையாக பிட்சைப் பயன்படுத்திக் கொண்டார். அவரது பந்துகள் அருமையாக இறங்கியதோடு, ஓரளவுக்கு நல்ல பவுன்ஸ், பிட்ச் அளித்த உதவியைப் பயன்படுத்தி கூடுதலாக பந்தை டர்ன் செய்தார், ஆனால் டர்ன் ஆகாத பந்துகளில்தான் கடந்த டெஸ்ட் போல் இந்திய வீரர்கள் காலியாயினர்.

இந்திய அணியில் முரளி விஜய் ‘காயம்’ காரணமாக இடம்பெறவில்லை அவருக்குப் பதிலாக மற்றொரு தமிழக வீரரும் இடது கை பேட்ஸ்மெனுமான அபினவ் முகுந்த் சேர்க்கப்பட்டார். ஜெயந்த் யாதவுக்குப் பதிலாக கூடுதல் பேட்ஸ்மெனாக கருண் நாயர் சேர்க்கப்பட்டுள்ளார். ஸ்டார்க் வீசிய முதல் ஆஃப் வாலி பந்தை ராகுல் அருமையாக கவர் திசையில் பவுண்டரி அடித்துத் தொடங்கினார். பிறகு ஒரு அடர்த்தியான எட்ஜில் பவுண்டரியுடன் முதல் ஓவரிலேயெ 10 ரன்கள் என்று இந்தியா தொடங்கியது. 8 பந்துகளைச் சந்தித்த அபினவ் முகுந்த் 2011-க்குப் பிறகு டெஸ்ட் வாய்ப்பு கிடைத்தும் 1 ரன் எடுக்க முடியாமல் மிட்செல் ஸ்டார்க்கின் நேர் புல்டாஸை கால்காப்பில் வாங்கி எல்.பி.ஆனார். யார்க்கர் முயற்சி புல்டாஸ் ஆனது, அதை நேராக ஆடாமல், கிராஸாக ஆடி எல்.பி.ஆனார்.

முதல் டெஸ்ட் போட்டியில் ரிவியூக்களை விரயம் செய்ததால் அவருக்கு ரிவியூ அனுமதிக்கப்படாமல் இருந்திருக்கலாம். ஹேசில்வுட்டும் ஸ்டார்க்கும் கட்டுக்கோப்புடன் வீசினர். முதல் 12 ஓவர்களில் 6 மெய்டன்கள், ஆஃப் ஸ்டம்ப் லைனில் வீசி இந்திய பேட்ஸ்மென்களை ரன் எடுப்பதில் சிரமம் ஏற்படுத்தினர். ராகுல் தன் சொந்த பிட்ச் என்பதால் சரியாகவே ஆடினார், அவ்வப்போது ஹேசில்வுட் பந்துகள் அவரது பொறுமையைச் சோதித்தது. புனே பிட்ச் ஹீரோ ஓகீஃப், ராகுல் மேலேறி வந்து ஆட முயன்ற போது பிளைட்டில் அவரை ஏமாற்றினார். ஆனால் இம்முறை கேஎட்ச் ஆகவில்லை.ஹேண்ட்ஸ்கம்பிற்கு இடது புறம் தாழ்வாகச் சென்றது. கடினமான வாய்ப்பு.

ராகுல் மீண்டும் விட்டுக் கொடுத்திருப்பார் ஆனால் அவர் அதிர்ஷ்டம் அவரைக் காப்பாற்றியது. புஜாரா வழக்கம்போல் சில இறுக்கமான பந்து வீச்சிற்கு நிதானம் காட்டி 66 பந்துகளில் 1 பவுண்டரியுடன் 17 ரன்கள் எடுத்த நிலையில் உணவு இடைவேளைக்குச் சற்று முன்னர் நேதன் லயன் வீசிய பந்து ஒன்று ஆஃப் ஸ்டம்புக்கு சற்று வெளியே பிட்ச் ஆகு உள்ளே திரும்பி எழும்பிய பந்துக்கு முதலில் முன்னால் செல்ல நினைத்து பிறகு பின்னால் வந்து ஆட பவுன்சினால் பந்து மட்டையின் உள்விளிம்பில் மேலாகப் பட்டு ஹேன்ட்ஸ்கம்பிடம் கேட்ச் ஆனது.

ஸ்டம்புக்கு வந்த பந்தை ஆடாமல் விட்டு எல்.பி.ஆகி ரிவியூவையும் விரயம் செய்த கோலி:

கோலி இறங்கினார், ஸ்டார்க்கின் ஒரு ஷார்ட் பிட்ச் பந்தில் பீட்டன் ஆகி அடுத்த ஃபுல் பந்தை கவருக்கும் மிடாஃபுக்கும் இடையே அபாரமாக பவுண்டரி அடித்தார். பிறகு கவரை காலியாக விட்டு கோலியை டிரைவ் ஆட வைத்து எட்ஜ் எடுக்கவைக்கும் முயற்சியில் லயன் ஒரு பந்தை வீச கோலி கவர் திசையிலேயே பவுண்டரி அடித்து பதிலடி கொடுத்தார். ஆனால் இதே ஓவரில்தான் அவர் 12 ரன்களில் இருந்த போது லயனின் ஸ்டம்பைக் குறிவைத்த ஆஃப் பிரேக் பந்தை ஆடாமல் விட முடிவெடுக்க கால்காப்பில் வாங்கினார் எல்.பி.என தீர்ப்பளிக்கப்பட்டது. ராகுலுடன் பேசி ரிவியூ செய்ய முடிவெடுத்தார், ஆனால் பெரிய திரையில் இவர் அவுட் என்று தெரிந்தவுடன் தீர்ப்புக்குக் காத்திருக்காமல் நடையைக் கட்டினார். விரயமான ரிவியூ. மீண்டும் அதிகமாக திரும்பும் என்று நினைத்து ஆடாமல் விட பந்து போதிய அளவு திரும்பியது.

அடுத்ததாக ரஹானே 2 பவுண்டரிகளுடன் திருப்தி அளிக்காத ஒரு இன்னிங்ஸில் 17 ரன்கள் எடுத்து லயன் வீசிய ஆஃப் பிரேக் பந்திற்கு மேலேறி வந்தார், பந்து திரும்பவில்லை மட்டையைக் கடந்து வேடிடம் சென்றது, வேட் சரியாகப் பந்தைச் சேகரிக்கவில்லை, ஆனால் ரஹானே கொஞ்சம் அதிகமாகவே கிரீசை விட்டு வந்ததால் ஸ்டம்ப்டு செய்யப்பட்டது.

ரஹானே ஆட்டமிழந்த பிறகு கருண் நாயர் 3 பவுண்டரிகளுடன் 24 ரன்கள் எடுத்து ஓரளவுக்கு நன்றாகவே ஆடிவந்தார், 24 ரன்களுக்குப் பிறகே இவர் நின்று ஆடியிருக்க வேண்டும், ஆனால் நேதன் லயன், ஓகீஃப், கேப்டன் ஸ்மித் தனது களவியூகங்களினால் கொடுத்த் நெருக்கடி காரணமாக ஓகீஃப் வீசிய பந்துக்கு எந்த ஒரு திட்டமும் இல்லாமல் கிரீஸை விட்டு வெளியே வந்தார், காற்றில் பந்து மெதுவாக வர பிட்ச் ஆன பிறகு கருண் நாயர் தடுத்தாட முனைந்தார், ஆனால் பந்தை அவரால் எட்ட முடியாமல் போக மட்டையைக் கடந்து வேடின் ஸ்டம்புக்கு ஆளாகி வெளியேறினார்.

அஸ்வினுக்கு லயன் அருமையாக வீசி செட் செய்தார், முதலில் அவரை முன்னால் வந்து ஆட ஆடவைத்து ஒரு பந்தை பின்னால் சென்று ஆடுமாறு பணிக்க பந்து திரும்பி எழும்பியது மட்டையில் பட்டு வார்னரிடம் கேட்ச் ஆனது.

விருத்திமான் சஹா 1 ரன் எடுத்த நிலையில் இயல்பாக வீசப்பட்ட சாதாரண பந்துதான் ஆனால் பந்தின் திசையை மாற்றியது லயனின் சாதுரியம், பின்னால் சென்றார் சஹா பந்து திரும்பும் என்று நினைத்தார் திரும்பவில்லை தடுத்தாட எண்ணி மட்டையைக் கொண்டு சென்றார் எட்ஜ் ஆகி ஸ்மித்திடம் ஸ்லிப்பில் கேட்ச் ஆனது.

ஜடேஜா தடவியபடிதான் ஆடினார். 16 பந்துகள் தடவி 3 ரன்கள் எடுத்த நிலையில் லயனின் நேரான பந்து ஒன்றில் மட்டையின் உள்விளிம்பில் பட்டு ஸ்மித்திடம் கேட்ச் ஆனது, இதே பந்துக்கு எல்.பி.அப்பீலும் இருந்தது, 3-வது நடுவர் தீர்ப்பளித்தார்.

கே.எல்.ராகுல் அருமையாக ஆடி 90 ரன்கள் எடுத்து லயன் பந்தை ஸ்பின்னுக்கு எதிரான திசையில் கவர் டிரைவ் ஆட நினைத்தார், மிட் ஆஃபில் கேட்ச் கொடுத்தார். பந்து மட்டையின் மேல் பகுதியில் பட்டு பிறகு பாலோ த்ரூவில் காலில் பட்டு மிட் ஆபில் கேட்ச் ஆனது.

அடுத்த பந்திலேயே இசாந்த் சர்மா பேட்-பேடு கேட்ச் கொடுத்து வெளியேற இந்திய இன்னிங்ஸ் லயனின் அடுத்த இன்னிங்ஸ் ஹேட்ரிக் வாய்ப்புடன் 189 ரன்களுக்கு முடிவுற்றது.

ஆஸ்திரேலியா இன்றைய தினத்தில் இன்னும் 11 ஓவர்கள் மீதமுள்ள நிலையில் விக்கெட் இழப்பின்றி 17 ரன்கள் எடுத்துள்ளது.