ஐஎஸ்எல்: சென்னையை பந்தாடியது டெல்லி

டெல்லி இந்தியன் சூப்பர் லீக் (ஐஎஸ்எல்) கால்பந்து போட்டியில் நேற்று நடைபெற்ற ஆட்டத்தில் டெல்லி டைனமோஸ் எப்.சி. அணி 4-1 என்ற கோல் கணக்கில் சென்னையின் எப்.சி. அணியைத் தோற்கடித்தது.

டெல்லியில் நேற்று நடைபெற்ற இந்த ஆட்டத்தின் முதல் நிமிடத்திலேயே ராய்மேக்கர்ஸ் கோலடித்து டெல்லிக்கு அசத்தலான தொடக்கம் ஏற்படுத்தினார். தொடர்ந்து 21-வது நிமிடத்தில் அந்த அணியின் ஜங்கர் கோலடிக்க, முதல் பாதி ஆட்டநேர முடிவில் டெல்லி 2-0 என முன்னிலை பெற்றது.

2-வது பாதி ஆட்டத்தின் 69-வது நிமிடத்தில் சென்னைக்கு முதல் கோலை பெற்று தந்தார் இலனோ. இதன்பிறகு 79-வது நிமிடத்தில் டெல்லி 3-வது கோலை அடித்தது. பெனால்டி வாய்ப்பின் மூலம் ஹெரேரோ இந்த கோலை அடித்தார்.

90-வது நிமிடத்தில் டெல்லியின் சாண்டோஸ் கோலடிக்க அந்த அணி 4-1 என்ற கோல் கணக்கில் அபார வெற்றி கண்டது.

கொல்கத்தாவில் இன்று நடைபெறும் ஆட்டத்தில் கொல்கத்தாவும், கேரளாவும் மோதுகின்றன. பயிற்சியாளர் சஸ்பெண்ட் ஐஎஸ்எல் போட்டியில் ஒழுங்கு நடவடிக்கை விதிமுறைகளை மீறியதாக அட்லெடிகோ டி கொல்கத்தா பயிற்சியாளர் அந்தோணியோ லோபஸுக்கு 4 போட்டிகளுக்கும், கோவா வீரர் ராபர்ட் பயர்ஸ், அட்லெடிகோ வீரர் பிக்ரு லெமெஸா ஆகியோருக்கு 2 போட்டிகளுக்கும் தடை விதித்துள்ளது அகில இந்திய கால்பந்து சம்மேளனம்.

இதுதவிர இவர்களுக்கு தலா ரூ.5 லட்சம் அபராதமும் விதிக்கப்பட்டுள்ளது. இதேபோல் அட்லெடிகோ கோல் கீப்பிங் பயிற்சியாளர் பிரதீப் குமாருக்கு ஒரு போட்டிக்கு தடையும், ரூ.30 ஆயிரம் அபராதமும் விதிக்கப்பட்டுள்ளது.